Франция президенти Эммануэль Макрон Шенген зонаси ва Европа Иттифоқининг ташқи чегаралари 17 мартдан кириш учун ёпилишини маълум қилди, деб хабар беради Le Figaro.
Ҳозирча ушбу чеклов 30 кун давомида амалга бўлади.
«Европага кирмайдиган ҳамда Европа Иттифоқига аъзо давлатлараро барча ҳаракатлар тўхтатилади», — дейди Макрон. Унинг таъкидлашича, ушбу қарор Европа Иттифоқининг бошқа аъзолари билан биргаликда қабул қилинган.
Аввалроқ Европа Иттифоқи раҳбарияти Шенген зонаси ҳудудига киришни тақиқлаб қўйиши мумкинлиги ҳақида хабарлар тарқалганди. Маълумотларга кўра, Макрон, Германия канцлери Ангела Меркель, Еврокомиссия раиси Урсула фон дер Ляйен ҳамда Европа кенгаши раҳбари Шарль Мишелнинг телефон орқали мулоқотида ушбу масала кўтарилган.
Шунингдек, Шенгенга аъзо бўлган 26 давлатдан ташқари, унинг таркибиги кирмайдиган, аммо Евроиттифоққа аъзо бўлган давлатлар — Ирландия, Кипр, Хорватия, Руминия ва Болгария учун ҳам чеклов жорий қилиниши мумкин.
Аввалроқ «Аэрофлот» компанияси Ўзбекистонга парвозларни тўхтатгани, Ўзбекистон ҳам коронавирус сабаб авиа ва автоқатновларни тўхтатгани, чет элда қолган ватандошлар чартер рейсларида қайтарилиши ҳақида хабарлар берилган. Россияда 13 март, жума куни, италияликлар ва Апенин яриморолидан келган бошқа хорижликларга мамлакат ҳудудига кириш вақтинча тақиқланган. АҚШда ҳам янги турдаги COVID-19 коронавирусининг тарқалиши сабаб Европа мамлакатларидан келувчилар учун 30 кунга вақтинчалик тақиқ ўрнатилган.Маълумот учун, 15 март куни Ўзбекистонда ҳам коронавирус билан касалланиш билан боғлиқ илк ҳолат қайд этилди. Вирус 11 март куни Франциядан қайтган аёлда аниқланган эди. Кейинроқ, 16 март куни COVID-19 коронавирус касаллигини юқтирган фуқаролар сони 10 нафарга етгани маълум бўлди.
Изоҳ (0)