Қирғизистонда ҳам мактаблар ва олий таълим муассасалари 3 ҳафтага карантинга ёпилади

Қирғизистонда 16 мартдан бошлаб барча мактаблар ва олий таълим муассасалари 3 ҳафтага карантинга ёпилади. Бундай қарор Қирғизистон хавфсизлик кенгашининг президент Сўронбой Жээнбеков бошчилигида ўтган йиғилишида қабул қилинган, деб хабар берди Sputnik.

Жээнбеков йиғилишда барча давлатлар коронавирус эпидемияси сабабли иқтисодий йўқотишларга қарамай, аҳоли саломатлигини биринчи ўринга қўйиб, чегаралар ва йўналишларни ёпишга борганини таъкидлаб ўтган.

«Қирғизистон ҳам ушбу йўналишда ишламоқда. Очиқчасига айтиш керак, ушбу вазият иқтисодиётга таъсир қилади. Биз давлат бюджетини тежаш режимига ўтишимиз ҳамда таҳдидлар ва чақириқларга тайёр туришимиз лозим», — деган Қирғизистон президенти.

Жээнбеков аҳоли соғлиғи энг устувор масала эканини алоҳида таъкидлаб ўтган. У коронавирус бўйича вазият шахсан унинг назоратида экани, ҳар соат унга давлат идораларидан маълумотлар келиб тушаётганини қайд этган.

«Жамиятда турли миш-мишлар, уйдирмалар юрибди. Рақамлаштириш асрида тасдиқланмаган ахборот ижтимоий тармоқлар орқали тезда тарқалади. Мамлакатда коронавирус йўқлигига шубҳа қилувчилар ҳам бор. Қўшни давлат — Қозоғистонда бу касаллик қайд қилингани ортида бизда ҳам хавотирланиш кучаяди. Бу табиий жараён. Биз ишни кучайтириб, жамиятга тезкорлик ва очиқ-ойдинлик билан ахборот тақдим қилишимиз керак», — деган Қирғизистон президенти.

Қирғизистон ҳукуматининг таъкидлашича, мамлакатда айни вақтда коронавирусга чалиниш ҳолатлари қайд этилмаган.

Сўнгги маълумотларга кўра, дунё бўйлаб коронавирус билан касалланганлар сони 156 мингдан ошди. 5819 киши вафот этди.

15 март куни Ўзбекистонда коронавирусга чалиниш билан боғлиқ биринчи ҳолат қайд этилди. Коронавирус билан касаллангани Ўзбекистонда аниқланган илк бемор — аёл киши, Тошкент шаҳридан. «Дарё» манбасининг маълум қилишича, у Францияда бир ҳафтадан ортиқ бўлиб, сўнг Ватанга қайтган. Аёл қайтган рейсда, бирламчи маълумотларга кўра, 48 йўловчи, шунингдек, экипаж аъзолари бўлган. Уларнинг барчаси изоляцияга олинмоқда.