Ҳукуматнинг 2020 йил 11 мартдаги фармойишига асосан, 14—15 март кунлари Ўзбекистон бўйлаб «Обод юрт» умумхалқ хайрия ҳашари ҳамда ободонлаштириш ишлари ўтказилди. Бу ҳақда Маҳалла ва оилани қўллаб-қувватлаш вазирлиги матбуот хизмати «Дарё»га хабар берди.
Наврўз умумхалқ байрамини муносиб нишонлашга тайёргарлик кўриш, ўзаро меҳр-оқибат ва ҳамжиҳатликни янада кучайтириш, аҳоли турар жойларини обод этиш ва кўкаламзорлаштириш мақсадида бўлиб ўтган анъанавий тадбирда қарийб 16 миллион нафар фуқаро қатнашди. Уларнинг 9 миллион 462 минг нафари ёшлардир.
Ҳашар давомида 34 минг гектардан ортиқ ер майдони ободонлаштирилди. Салкам 23 минг километрга яқин узунликдаги ариқ ва лотоклар тозаланиб, 41,7 минг тонна чиқинди чиқариб ташланди. 11,7 миллион туп мевали ва манзарали дарахт ҳамда 8,4 миллионта гул кўчати ўтқазилди. 12,7 миллион туп дарахт оқланиб, уларга шакл берилди.
Вазирлик маълумотларига кўра, қарийб 10 минг атрофида қабристон ва 686 та зиёратгоҳ озода ҳолга келтирилди. Мазкур ишларни амалга ошириш жараёнида 16 минг 847 та техника воситаси жалб этилди.
Хайрия тадбирлари мобайнида 2 миллиард 840 минг сўмга яқин, шундан, салкам 69 миллион 373 сўм маблағ «Маҳалла» фонди ҳисобидан аҳолининг ижтимоий ҳимояга муҳтож қатламига беминнат мурувват ёрдамлари кўрсатишга сарфланди. Ҳашар куни 12,5 мингта кам таъминланган оила уй-жойлари ҳашар йўли билан таъмирланди. 19 мингтадан зиёд эҳтиёжманд оила, 7,5 минг нафарга яқин ногирон ва ёлғиз кексалар моддий жиҳатдан қўллаб-қувватланди.
Бундан ташқари, ҳашар мобайнида 60 дан ортиқ маиший хизмат кўрсатиш шохобчалари: савдо дўкони, гўзаллик салони, сартарошхона, кутубхона, дорихона, новвойхона, нуронийлар маркази, 50 га яқин ишлаб чиқариш цехи, 40 та МФЙ идораси ҳамда ўнлаб болалар спорт майдончалари фойдаланишга топширилди.
Изоҳ (0)