Hukumatning 2020-yil 11-martdagi farmoyishiga asosan, 14—15-mart kunlari O‘zbekiston bo‘ylab “Obod yurt” umumxalq xayriya hashari hamda obodonlashtirish ishlari o‘tkazildi. Bu haqda Mahalla va oilani qo‘llab-quvvatlash vazirligi matbuot xizmati “Daryo”ga xabar berdi.
Navro‘z umumxalq bayramini munosib nishonlashga tayyorgarlik ko‘rish, o‘zaro mehr-oqibat va hamjihatlikni yanada kuchaytirish, aholi turar joylarini obod etish va ko‘kalamzorlashtirish maqsadida bo‘lib o‘tgan an’anaviy tadbirda qariyb 16 million nafar fuqaro qatnashdi. Ularning 9 million 462 ming nafari yoshlardir.
Hashar davomida 34 ming gektardan ortiq yer maydoni obodonlashtirildi. Salkam 23 ming kilometrga yaqin uzunlikdagi ariq va lotoklar tozalanib, 41,7 ming tonna chiqindi chiqarib tashlandi. 11,7 million tup mevali va manzarali daraxt hamda 8,4 millionta gul ko‘chati o‘tqazildi. 12,7 million tup daraxt oqlanib, ularga shakl berildi.
Vazirlik ma’lumotlariga ko‘ra, qariyb 10 ming atrofida qabriston va 686 ta ziyoratgoh ozoda holga keltirildi. Mazkur ishlarni amalga oshirish jarayonida 16 ming 847 ta texnika vositasi jalb etildi.
Xayriya tadbirlari mobaynida 2 milliard 840 ming so‘mga yaqin, shundan, salkam 69 million 373 so‘m mablag‘ “Mahalla” fondi hisobidan aholining ijtimoiy himoyaga muhtoj qatlamiga beminnat muruvvat yordamlari ko‘rsatishga sarflandi. Hashar kuni 12,5 mingta kam ta’minlangan oila uy-joylari hashar yo‘li bilan ta’mirlandi. 19 mingtadan ziyod ehtiyojmand oila, 7,5 ming nafarga yaqin nogiron va yolg‘iz keksalar moddiy jihatdan qo‘llab-quvvatlandi.
Bundan tashqari, hashar mobaynida 60 dan ortiq maishiy xizmat ko‘rsatish shoxobchalari: savdo do‘koni, go‘zallik saloni, sartaroshxona, kutubxona, dorixona, novvoyxona, nuroniylar markazi, 50 ga yaqin ishlab chiqarish sexi, 40 ta MFY idorasi hamda o‘nlab bolalar sport maydonchalari foydalanishga topshirildi.
Izoh (0)