ТИВ Ўзбекистон фуқароларига ватанга қайтиш учун давлат чегарасидан ўтиш тақиқланмаганини маълум қилди

Ташқи ишлар вазирлиги Ўзбекистон ҳудудига кириш учун тақиқлар борасида қўшимча маълумот ва изоҳ берди.

Республика махсус комиссияси томонидан қабул қилинган коронавирус тарқалишининг олдини олиш бўйича вақтинча чеклов чоралари муносабати билан Ўзбекистон Ташқи ишлар вазирлиги қуйидагиларни маълум қилади:

«Хориждаги Ўзбекистон фуқароларига ватанга қайтиш учун давлат чегарасидан ўтиш тақиқланмайди. Ўзбекистон ҳудудига киришга қўйилган чекловлар, авваламбор, бошқа давлатларнинг фуқароларига тегишли.

Шу билан бирга, давлатдан ташқарига чиқиш бўйича вақтинча тақиқ Ўзбекистон фуқароларига тегишли бўлиб, ҳозирда мамлакатимизда бўлиб турган хорижий фуқароларга нисбатан қўлланилмайди».

Бош вазир Абдулла Арипов иштирокидаги матбуот анжуманида аёлда коронавирус аниқлангач, унинг 9 нафар оила аъзоси, шунингдек, рейснинг Ўзбекистонда қолган йўловчилари ва улар билан мулоқотда бўлган одамлар — жами 150 киши изоляцияга олингани айтилган. 16 мартдан бошлаб хорижий давлатлар билан барча авиарейслар бекор қилиниб, автотранспорт воситасида Ўзбекистонга кириш-чиқиш тўхтатилади.

Ҳукумат Ўзбекистондаги диний идораларга диний маросимлар ўтказишни вақтинча чеклаш бўйича илтимос билан мурожаат қилган, шунингдек, барча спорт (масалан, Суперлига), маданий (жумладан, концерт) ва бошқа тадбирлар, шунингдек, Наврўз тантаналари ва у билан боғлиқ бошқа оммавий маросимлар ҳам бекор қилинган (лекин тўйларни ўтказиш мумкин). Бош вазир иштирокидаги матбуот анжуманида болалар боғчалари, ўрта мактаблар ва олий таълим муассасалари (давлатникими, хусусийми, фарқи йўқ) карантинга ёпилиши ҳам айтилган.