ТИВ Қирғизистонда ватанга қайтиш учун навбатда турган ўзбекистонлик талабалар ҳақидаги хабарни тасдиқлади

2020 йилнинг 14 март куни Ўзбекистоннинг Бишкек шаҳридаги элчихонаси Қирғизистоннинг қатор университетларида ўқишини кўчириш ва ватанда таълим олиш учун ҳужжатларини олмоқчи бўлган ўзбекистонлик талабаларнинг турнақатор навбатларда туриб қолаётгани ҳақидаги хабарни тасдиқлади. Бу ҳақда Ташқи ишлар вазирлиги хабар қилган.

Вазият элчихона назорати остида. Муаммони белгиланган тартибда ҳал қилиш учун Қирғизистон расмийлари билан музокаралар ўтказилган.

Шунингдек, Ўзбекистоннинг таълим муассасалари вакиллари тегишли ҳужжатларни марказлаштирилган тартибда олиш учун Қирғизистон университетларига юборилди, дейилади хабарда.

Ташқи ишлар вазирлиги ватандошларга зарур ҳолатларда Ўзбекистоннинг Бишкекдаги элчихонасига +996-312-986-296 телефон рақами орқали мурожаат қилишлари мумкинлигини ҳам эслатган.

7 март куни Қирғизистонда коронавирус сабаб барча спорт мусобақалари бекор қилинган, 12 март куни савдо, хизмат кўрсатиш ва умумий овқатланиш соҳасида фаолият юритувчи жисмоний ва юридик шахсларга ҳам оммавий тадбирларни ўтказмаслик тавсия этилган. Қирғизистон ҳукумати коронавирус қайд этилган давлатларга борган хорижликларнинг мамлакатга киришини тақиқланган, 16 мартдан бошлаб барча мактаблар ва олий таълим муассасалари карантинга ёпилади.