Чимкентликлар ҳалокатли коронавируснинг олдини олиш учун халқ табобати усулларига мурожаат қилмоқда. Tengrinews’нинг ёзишича, фуқаролар антисептик хусусиятлари билан машҳур исириқни бирин-кетин сотиб олишмоқда.
Айрим бозорларда исириқнинг ҳаммаси сотилиб кетган, шунга қарамай уни ҳали ҳам топиш мумкин. Сотувчиларнинг айтишича, бозорларда исириқ олишда ҳеч қандай ҳовлиқишлар йўқ, лекин унга бўлган талаб ортиб бормоқда.
«Кеча яхши савдо бўлганди. Исириқ вирусга қарши яхши иш беради. Унақа кўп ҳам керак эмас, озгина етади», — дейди сотувчилардан бири.
Хабарда айтилишича, Чимкентдаги дорихоналарда тиббий ниқоблар йўқ. Мутахассислар у коронавирусдан ҳимоя қилмайди, деб айтмоқда. Тез орада дока ниқоблар сотувга чиқарилади, улар аллақачон буюртма қилинган. Дорихоначиларнинг сўзларига кўра, сўнгги кунларда қўл учун антисептик воситаларга талаб ошган. Улар аллақачон сотилиб кетган.
Қайд этилишича, айни пайтда Қозоғистонда коронавирусга чалинишнинг 4 та ҳолати тасдиқланган. Дастлабки икки ҳолат Германиядан қайтган қозоғистонликларда аниқланган. Улардан бири 9 март куни келган бўлиб, у билан бирга самолётда учган 73 нафар йўловчи топилиб, карантинга жойлаштирилади. Иккинчи касалланган шахс эса 12 март куни келган У билан бирга бўлган 12 нафар фуқаро, шу жумладан, экипаж аъзолари ҳам дарҳол Олмаотадаги юқумли касалликлар шифохонасига жойлаштирилган.Кейинроқ коронавирусга чалинишнинг учинчи ҳолати аниқланган — Нур-султон шаҳридан бўлган аёл Миландан қайтган. Шундан кейин мамлакат соғлиқни сақлаш вазири Диас Аҳмадшариф касалланишнинг тўртинчи ҳолатини маълум қилган.
Аввалроқ Қозоғистон президенти Қосим-Жўмард Тўқаев махсус профилактика чоралари оширилишини эълон қилиб, оммавий тадбирларни бекор қилганди. Мактаб ўқувчилари эса муддатидан аввал таътилга чиқадиган бўлди. Шунингдек, давлат органларига хориж хизмат сафарига чиқиш тақиқланди.
Изоҳ (0)