Украинанинг Житомир вилоятида 12 март куни коронавирус инфекцияси билан касалхонага ётқизилган 71 ёшли аёл вафот этди. Бу ҳақда Украина Соғлиқни сақлаш вазирлигига таяниб, Meduza хабар берди.
Маълум қилинишича, аёлнинг қариндошлари ва у билан алоқада бўлган бошқа одамлар шифокорлар назоратига олинган.
Коронавирус билан боғлиқ биринчи ўлим ҳолати ҳақидаги хабардан кейин, Украина хорижликларнинг мамлакатга киришини чеклашга қарор қилди. Маълумотларга кўра, чегара 48 соатдан кейин ёпилади.
Украина Соғлиқни сақлаш вазирлигининг 13 март маълумотларига кўра, Житомир вилоятидаги ҳолатдан ташқари, мамлакатда коронавирус билан касалланиш бўйича яна иккита ҳолат аниқланган, уларнинг иккаласи ҳам Черновци вилоятида қайд этилган. 2020 йил бошидан бери Украина Соғлиқни сақлаш марказига COVID-19 шубҳаси билан 55 та хабар келиб тушган, уларнинг 49 таси тасдиқланмаган, учтаси текширилмоқда.
Аввалроқ, Киевда коронавирус сабабли 12 мартдан бошлаб оммавий тадбирлар тақиқланиши, мактаблар ёпилиши маълум қилинган эди.
Озарбайжонда ҳам коронавирус билан боғлиқ биринчи ўлим ҳолати кузатилди. Қозоғистон фуқароларига қўл бериб кўришмаслик тавсия қилинди. Шунингдек, фуқароларга оммавий тадбирларга бормаслик тавсия этилмоқда. Қирғизистон ҳукумати коронавирус қайд этилган давлатларга борган хорижликларнинг мамлакатга киришини тақиқлади. Россия италияликлар ва Апенин яриморолидан келган бошқа хорижликларга мамлакат ҳудудига киришни вақтинча тақиқлади.
Мавзуга доир: Қозоғистонда икки кишида коронавирус қайд этилди
Изоҳ (0)