Марказий банк Ўзбекистоннинг халқаро захиралари 30 млрд доллардан ошганини эълон қилди

Марказий банк Ўзбекистон олтин-валюта захираларининг янгиланган статистикасини эълон қилди.

2020 йил 1 март ҳолатига кўра, расмий захиралар 30,5 миллиард долларни ташкил этди. Халқаро захиралар — 30,01 миллиард доллар. Ўзбекистоннинг захиралари заиф диверсификацияланган, шунинг учун деярли барча миқдор хорижий валюта (12,8 миллиард доллар) ва олтин (17,2 миллиард доллар) ўртасида тақсимланган.

Марказий банк ушбу маълумотларни ошкор қилиб, расман эълон қилишни бошлаганидан бери (2017 йил) расмий захиралар биринчи марта 30 миллиард доллардан ошган.

Захиралар олтин нархининг ўсиши ҳисобига ортган, олтиннинг ўзи 2020 йил февраль ойига нисбатан камайди — 10,6 миллион троя унцияси (банклар ва заргарлар томонидан ишлатиладиган оғирлик бирлиги 31,1034768 грамм). Агар тоннага айлантирилса, бу 330 тоннани ташкил этади.

Захиралар мамлакатнинг «хавфсизлик ёстиқчаси» ҳам ҳисобланади — улар салбий ташқи шок ҳолатларда зарбани камайтирувчи омил сифатида зарур ва захираларнинг етарлилиги шок ҳолатларнинг хусусиятига бевосита боғлиқ.

2019 йил кузида Ўзбекистон 13 ойлик импортни молиялаштириш учун етарли захирага эга экани маълум бўлган. Бу тавсия этилган кўрсаткичдан тўрт баравар кўплигини англатади.