Фаластинлик модел ва инсон ҳуқуқлари фаоли Надин Аюб ноябрь ойида Таиландда ўтказиладиган “Мiss Universe 2025” танловида иштирок этади. У халқаро гўзаллик мусобақасида мамлакати шарафини ҳимоя қиладиган биринчи фаластинлик аёл бўлади.

“Мiss Universe” (МUО) ташкилоти CNN’га якшанба куни юборган баёнотида Аюбнинг ноябрь ойида бўлиб ўтадиган “Мiss Universe 2025” танловида иштирок этишини “мамнуният билан тасдиқлашини” маълум қилди:
“Аюб хоним Фаластинда вояга етган, муваффақиятли модел ва инсон ҳуқуқлари ҳимоячисидир. У бизнинг платформамизни муҳим ўрин тутадиган хислатлар — матонат ва қатъиятни ўзида мужассам этади”, дейилади баёнотда.
Аюб 21 ноябрь куни Таиланд пойтахти Бангкокда ўтказиладиган 74 сонли “Дунё гўзали” финалида 130 дан ортиқ давлатдан келган иштирокчилар қаторида бўлади.

“Биз хоним Аюбни саҳнада кўришни сабрсизлик билан кутамиз. У бу ерда фахр билан Фаластинни намойиш этади ва бутун дунёдан келган рақиб иштирокчилар билан ёнма-ён туради”, дейилади МUО хабарида.
27 ёшли Надин 2022 йилда “Фаластин гўзали” унвонига сазовор бўлган. У ўзининг Instagram саҳифасида она халқининг овозига айланишни исташи ҳақида ўз фикрларини билдирди.
Фаластин соғлиқни сақлаш вазирлиги 18 август куни эълон қилган маълумотга кўра, 2023 йил октябрида уруш бошланганидан бери Ғазода камида 62 004 киши ҳалок бўлган. Уларнинг аксарияти аёллар ва болалар бўлган.
Изоҳ (0)