Франция Миллий ассамблеясининг (парламент қуйи палатаси) тўрт нафар депутати ва икки ишчиси янги турдаги коронавирус билан касаллангани маълум бўлди, деб хабар беради «РИА Новости».
Аввалроқ Франция Миллий ассамблеяси аъзоси, Республикачилар партияси депутати Жан-Люк Рейцер коронавирус билан касаллангани ҳақида хабар берилганди. Шунингдек, «Олға, Республика!» партияси депутати Элизабет Тутю-Пикар ҳам коронавирус юқтириб олган.
«Миллий ассамблеянинг тўрт депутати ва икки нафар ишчисининг таҳлил натижалари уларда янги турдаги COVID-19 коронавируси борлигини тасдиқлади. Санитар текширувлар ўтказилмоқда, ассамблея хизматлари вируснинг тарқалишини олдини олиш бўйича чоралар кўрмоқда», — дейилади хабарда.
Шифокорларнинг таъкидлашича, касалликка чалинган депутатлар изоляция қилинган, улар кимлар билан мулоқотда бўлгани аниқланмоқда.
Аввалроқ Францияда коронавирус билан касалланганлар сони икки баравар кўпайгани ҳақида хабар берилган эди. Хитойда эпидемия бошлаганидан буён коронавирусга чалинганларнинг умумий сони 80 735 кишига етган. Жами 58,6 минг бемор тузалгани айтилмоқда. Дунё бўйлаб коронавирус инфекцияси кириб борган мамлакатлар сони 100 дан ошиб кетди.
Изоҳ (0)