Ўзбекистон Бош прокуратураси 6 март куни ижтимоий тармоқларда маҳкама биноси олдида гўёки бир гуруҳ аёллар «исён қилгани»га оид хабарлар юзасидан расмий баёнот берди.
Маълум бўлишича, бош прокурор Ниғматилла Йўлдошев 5 март куни видеоконференция алоқа орқали 19 нафар фуқарони қабул қилган. Шунга қарамай, 6 март куни Г.Каримбекова, Х.Эргашева, Г.Хўжахонова, Д.Дўлтаева ва бошқа бир гуруҳ аёллар Бош прокуратура биносига кириб, жанжал уюштириб, бош прокурор қабул қилишини сўраган.
«Бош прокурор хизмат сафарида бўлганлиги сабабли ушбу фуқаролар бош прокурорнинг биринчи ўринбосари Абдуҳалим Холмаҳматов томонидан қабул қилинган», — дейилади Бош прокуратура ахборотида.
Алоҳида таъкидланишича, Г.Каримбекова, Д.Дўлтаева ва бошқа бир гуруҳ фуқаролар 4 март куни ҳам Вазирлар Маҳкамасининг қабулхонасида жанжал уюштирганлиги учун бош прокурорнинг биринчи ўринбосари томонидан шахсан қабул қилинган эди.
Бош прокуратуранинг алоҳида қайд этишича, бу фуқаролар бош прокурор ва унинг ўринбосарлари қабулида бир неча бор бўлган, мурожаатлари белгиланган тартибда кўриб чиқилган ва ёзма жавоб хатлари берилган.
«Мазкур фуқаролар Бош прокуратура, Сенат, Вазирлар Маҳкамаси ва бошқа идораларда доимий равишда тартибсизликлар уюштириб, ноқонуний талаблари билан эътиборни ўзларига жалб қилиб келишмоқда», — дея қўшимча қилинган расмий ахборотда.
Изоҳ (0)