Ўзбекистонда сўнгги бир ой ичида олти нафар аёл ҳоким лавозимида иш бошлади. Жумладан, Дилфуза Ўролова Сирдарёнинг Боёвут туманига, Наргиза Неъматова Бухоронинг Олот туманига, Садбархон Мамитова Андижоннинг Бўстон туманига, Мақсуда Мустафоева Қашқадарёнинг Қарши туманига, Зулайҳо Маҳкамова Наманганнинг Тўрақўрғон туманига, Гавҳар Алимова эса Самарқанд вилоятининг Каттақўрғон шаҳрига ҳоким этиб тайинланди.
Халқаро хотин-қизлар куни муносабати билан 7 март куни Тошкентда ўтказилган асосий байрам тадбирида Президент Шавкат Мирзиёев янги аёл ҳокимларни алоҳида табриклагани ҳақида хабар берилган эди. «Kun.uz»нинг хабар беришича, давлат раҳбари ўз нутқи давомида нима учун аёллар ҳокимлик лавозимига тайинланаётганига изоҳ берган, шунингдек, аёл-ҳокимлар билан суҳбатлар вақтида уларга нима деганини айтиб ўтган.
Тарихимизда кўп сонли аёлларни ҳокимликка қўйиш ҳали бўлмаган. Ёки бўлганми? Бунга мен ташаббускор бўлиб, хоҳиш билдирдим. Чунки аёллар бўлган жойда адолат, поклик бўлади... Мен бир қанча туманларда ҳокимлик вазифаси бўйича аёлларга ишонч билдирдим. Улар билан суҳбат чоғида айтдимки: «Ҳеч нарсадан қўрқманглар!».Ишонаман — аёллар раҳбар бўлган туманларда адолат байроғи бошқача ҳилпирайди. Биз ҳокимликка сайланган раҳбар аёлларимизга доим ёрдам берамиз, елкадош бўламиз. Бундан кейин ҳам катта-катта ташкилот ва компаниялар раҳбарлигига аёлларни тайинлаш ташаббуси давом этади. Биз уларни тайёрлаяпмиз. Кимларгадир бу иш ёқмас, лекин менга ёқади.
Шавкат Мирзиёев, Ўзбекистон Президенти
Изоҳ (0)