Бухоро вилоятининг Қоракўл туманида қўшнисини ўзи яшаб турган уйдан баланд иморат қургани учун пичоқлаб ўлдирган фуқаро 19 йил 1 ой муддатга озодликдан маҳрум этилди. Бу ҳақда «Дарё»га жиноят ишлари бўйича Бухоро вилояти суди судьяси Фаррух Турсунов маълум қилди.
Қоракўл тумани «Эски-қалъа» маҳалласида яшовчи фуқаро I.Х. 2017 йил июль ойида эски уйини бузиб, янги иморат қурган. Иморатини қўшниси Ў.Э.нинг яшаб келаётган уйидан баланд қилиб қургани боис, қўшниси эътироз билдирган. Оилалар ўртасидаги келишмовчилик жанжалга айланган.
Можаро туман ИИБ профилактика инспектори томонидан кўриб чиқилган ва уларга нисбатан Маъмурий жавобгарлик тўғрисидаги кодекснинг 41-модда (ҳақорат қилиш) ва 52-моддаси (енгил тан жароҳати етказиш) билан маъмурий баённома расмийлаштирилган. Суд ишни кўриб чиқиб, қўшниларни огоҳлантирган ва яраштирган.
Бироқ, I.Х. ва Ў.Э. ўртасидаги низо кун сайин ёмонлашган. 2019 йил 16 сентябрь куни I.Х. қўшниси Ў.Э.нинг турмуш ўртоғи аразлаб кетганини айтиб, «Қўлингдан нима иш келди, ўзингни ос», деб масхара қилган. Бундан ғазабланган Ў.Э. яшаш уйидан олиб чиққан ошхона пичоғи ва қўлбола тайёрланган тиғли қуроли билан I.Х.нинг қорин, бўйин, олд кўкрак соҳасига, қорин бўшлиғига зарба берган.
Ў.Э.нинг қотиллигига I.Х.нинг ақли заиф укаси ҳам беихтиёр кўмаклашган. Ў.Э. эса I.Х.ни бўғизлашда давом этган. Ҳолатни кўрган қўшнилар I.Х. ёрдамга шошганда, Ў.Э. уларни ҳам қўлидаги пичоқ билан қўрқитиб, «яқинлашма, сўяман», деган. I.Х. ўта оғир тан жароҳатлари натижасида воқеа жойида вафот этган.
Ў.Э. қўшнисини ўлдириб, жасадини қабристон томон олиб қочиб кетган ва қўлидаги ошхона пичоғини ариққа ташлаб юборган.
Мазкур ишни кўриб чиққан Жиноят ишлари бўйича Бухоро вилоят суди Ў.Э.ни Жиноят кодексининг 97-моддаси 2-қисмининг «ж», «л», «п» бандлари (бир гуруҳ шахслар томонидан безорилик оқибатида ўта шафқатсизлик билан қасддан одам ўлдириш) билан айблаган ва унга 19 йил 1 ой озодликдан маҳрум қилиш жазосини қўллаган.
Қотилга кўмаклашган ақли заиф ука эса мажбурий даволанадиган бўлди.
Изоҳ (0)