«Ўзбекистон почтаси» коронавирус туфайли Хитойдан почта жўнатмалари кечикиб келишидан огоҳлантирди

«Ўзбекистон почтаси» коронавирус тарқалгани туфайли Хитойдан почта жўнатмалари кечикиб келишидан огоҳлантирди.

Хабарда таъкидланишича, Жаҳон соғлиқни сақлаш ташкилоти посилкаларни хавфсиз деб ҳисобламоқда, чунки коронавирус нарсалар устида, жумладан, бандеролларда узоқ вақт сақланмайди.

Шунга қарамай, «Ўзбекистон почтаси» Хитойдан почта жўнатмаларини қабул қилиш, санитария-эпидемиологик жиҳатдан уларнинг хавфсизлигини таъминлаш бўйича барча зарур чораларни кўриши айтилган.

Хитойдан почта жўнатмаларини етказиб бериш кечикишлари асосан ушбу давлат билан ҳаво транспорти парвозларининг вақтинча тўхтатилиши билан боғлиқлиги қўшимча қилинган.

«Ишонтириб айтамизки, Ўзбекистон почтаси ходимлари почта жўнатмаларингизни тезкорлик билан етказиб бериш учун доим ҳаракатда», — дейилади хабарда.

Аввалроқ AliExpress жўнатмаларининг коронавирус сабаб кечикишлар билан етиб келиши ҳақида хабар берилган эди.