Олимжон Исаев Наманган шаҳри ҳокими этиб тайинланди

Халқ депутатлари Наманган шаҳар кенгашининг навбатдан ташқари сессияси бўлиб ўтди. Бу ҳақда «Дарё» мухбири Азизбек Абдувалиев хабар бермоқда.

Сессияда ташкилий масала кўрилди. Шу пайтгача «Ўзагрокимёҳимоя» акциядорлик жамияти бошқаруви раиси бўлиб ишлаб келган Олимжон Исаев Наманган шаҳар ҳокими этиб тайинланди.

Олимжон Исаев 1972 йилда Наманганда туғилган. Тошкент давлат аграр университети ва Наманган давлат университетини тамомлаган.

Наманган шаҳридаги «Ифода агро кимё ҳимоя» корхонаси директори, вилоят фермерлар кенгаши раиси, «Мехмаш» МЧЖ кузатув кенгаши раиси вазифаларида ишлаган.

У 2018 йил май ойидан бери «Ўзагрокимёҳимоя» акциядорлик жамияти бошқарувига раислик қилиб келаётганди.

Сессия ишида Президент маслаҳатчисининг ўринбосари Умар Исмоилов, вилоят ҳокими Хайрулло Бозоров иштирок этди.

Маълумот учун, Наманган шаҳрининг собиқ ҳокими Шавкатжон Абдураззақов кеча, 5 март, куни Экология ва атроф-муҳитни муҳофаза қилиш давлат қўмитаси раиси лавозимига тасдиқланди.