Британиянинг Flybe авиакомпанияси коронавирус сабаб инқирозга учради

Британиянинг Flybe маҳаллий парвозларни амалга оширувчи авиакомпанияси коронавируснинг савдога таъсири сабаб банкрот бўлганини эълон қилди. Буюк Британия ҳукумати томонидан тасдиқланган қутқарув режаси ҳам компанияга ёрдам бера олмади, дейилади авиақатновни амалга оширувчи корхонанинг асосий акционери Virgin Аtlantic’нинг баёнотида. Бу ҳақда «РИА Новости» хабар берган.

Компания барча рейсларни тўхтатади ва икки мингдан ортиқ ходим ишсиз қолади.

«Афсуски, атрофдагилар, хусусан, ходимларнинг авиакомпанияни ҳар томонлама қўллаб-қувватлашига қарамай COVID-19 коронавирусининг Flybe чипталарининг савдосига таъсири кучли бўлди ва консорциум компанияга ортиқ молиявий кўмак бера олмайди», - дейилади Virgin баёнотида.

Буюк Британия ҳукумати қолган авиакомпаниялар, автобус ва темир йўл қатновларини амалга оширувчи операторлардан Flybe’дан чипта харид қилган йўловчилар узоғини яқин қилишни сўраган.

Январь ойида Британия ҳукумати Flybe’ни қурқариш юзасидан режани тасдиқлаган ва бу йўл билан компанияга бир неча ўн миллион фунт ажратмоқчи бўлганди. 2019 йил бошида авиакомпанияни Virgin Аtlantic ҳамда Cоnnect Airways инвесторлар консорциуми харид қилганди. Таъсисчилар орасида Stobart Group транспорт гуруҳи ва Cyrus Capital инвестфонди ҳам бўлган. Келишувнинг қиймати 2,2 миллион фунтни ташкил этган. Харидни амалга оширган инвесторлар бриж-кредит тарзида Flybe’га 20 миллион фунт стерлинг киритишни режалаштирганди.

Flybe’га 1979 йилда асос солинган ва Европанинг энг катта мустақил ҳудудий авиакомпанияларидан бири эди, рейслар 190 та йўналиш бўйича 15 та мамлакатга амалга ошириларди. Компания ихтиёрида 68 та самолёт бўлиб, улар йилига 8 миллион нафар йўловчига хизмат кўрсатарди.