Britaniyaning Flybe aviakompaniyasi koronavirus sabab inqirozga uchradi

Britaniyaning Flybe mahalliy parvozlarni amalga oshiruvchi aviakompaniyasi koronavirusning savdoga ta’siri sabab bankrot bo‘lganini e’lon qildi. Buyuk Britaniya hukumati tomonidan tasdiqlangan qutqaruv rejasi ham kompaniyaga yordam bera olmadi, deyiladi aviaqatnovni amalga oshiruvchi korxonaning asosiy aksioneri Virgin Atlantic’ning bayonotida. Bu haqda “RIA Novosti” xabar bergan.

Kompaniya barcha reyslarni to‘xtatadi va ikki mingdan ortiq xodim ishsiz qoladi.

“Afsuski, atrofdagilar, xususan, xodimlarning aviakompaniyani har tomonlama qo‘llab-quvvatlashiga qaramay, COVID-19 koronavirusining Flybe chiptalarining savdosiga ta’siri kuchli bo‘ldi va konsorsium kompaniyaga ortiq moliyaviy ko‘mak bera olmaydi”, - deyiladi Virgin bayonotida.

Buyuk Britaniya hukumati qolgan aviakompaniyalar, avtobus va temir yo‘l qatnovlarini amalga oshiruvchi operatorlardan Flybe’dan chipta xarid qilgan yo‘lovchilar uzog‘ini yaqin qilishni so‘ragan.

Yanvar oyida Britaniya hukumati Flybe’ni qurqarish yuzasidan rejani tasdiqlagan va bu yo‘l bilan kompaniyaga bir necha o‘n million funt ajratmoqchi bo‘lgandi. 2019-yil boshida aviakompaniyani Virgin Atlantic hamda Connect Airways investorlar konsorsiumi xarid qilgandi. Ta’sischilar orasida Stobart Group transport guruhi va Cyrus Capital investfondi ham bo‘lgan. Kelishuvning qiymati 2,2 million funtni tashkil etgan. Xaridni amalga oshirgan investorlar brij-kredit tarzida Flybe’ga 20 million funt sterling kiritishni rejalashtirgandi.

Flybe’ga 1979-yilda asos solingan va Yevropaning eng katta mustaqil hududiy aviakompaniyalaridan biri edi, reyslar 190 ta yo‘nalish bo‘yicha 15 ta mamlakatga amalga oshirilardi. Kompaniya ixtiyorida 68 ta samolyot bo‘lib, ular yiliga 8 million nafar yo‘lovchiga xizmat ko‘rsatardi.