Санкт-Петербургда коронавирус сабаб ОТМнинг 700 нафардан ортиқ талабаси карантинга олинди

Россиянинг Санкт-Петербург шаҳрида Мечников номидаги давлат шимоли-ғарбий тиббиёт университетининг 700 нафардан ортиқ талабаси карантинга олинди. Бунга италиялик талабада коронавирус кузатилгани сабаб бўлган, деб ёзмоқда «РБК».

Университет илм-фан ва инновацион фаолият масалалари бўйича проректори Алексей Силиннинг сўзларига кўра, талабанинг иситмаси кўтарилгач, маъмурият тезкор чораларни кўрган ва у Боткин номидаги касалхонага ўтказилган.

«Шундан кейин ‘Росботребнадзор’ карантин чора-тадбирларини амалга ошириш бўйича кўрсатма берди ва биз кечадан бошлаб барча ишларни амалга оширдик. Карантинга олинган ҳудуд ичкарисига одамлар киритилмаяпти», — деган проректор.

Шуниндек, Боткин касалхонасига юборилган италиялик талаба билан бирга ётоқхонада яшаган бошқа ёшлар ҳам карантинга олинган. Проректорнинг «Интерфакс» агентлигига маълум қилишича, талабалар ётоқхонада яшайдиганлар сменалардан қайтган ва уларнинг карантинга олиниши мувофиқлаштириб борилмоқда. Силиннинг айтишича, бу ОТМда ўқийдиганларнинг 20 фоиз қисмини ташкил қилади.

«Роспотребнадзор» гарчи хорижлик талаба дарсларда иштирок этмаган бўлса ҳам, унинг бошқалар билан мулоқотда бўлганини тахмин қилган.

Рикардо исмли талаба 29 февралда Санкт-Петербургга келган. Аэропортда унинг тана ҳарорати ўлчанганида ҳаммаси меъёрда экани маълум бўлган. Талабадаги касаллик аломатлари орадан бир неч кун ўтгач кўзга ташланган, шундан сўнг нафақат у, балки уни кутиб олган бошқа талабалар ҳам касалхонага олиб кетиб текширилган. Уларда ҳам вирус кузатилмаган.

Италия фуқаросидаги касаллик коронавируснинг енгил формаси ҳисобланади.

Италиянинг Россиядаги бош консуллиги Санкт-Петербургдаги фуқарода коронавирус кузатилганини расман тасдиқлаган.

«Айни вақтда ушбу ҳодиса беморнинг соғлиғига хавф солаётгани йўқ ва у махсус муассасада карантинга олинган. Махфийликни таъминлаш мақсадида бу борада батафсил маълумот бера олмаймиз», — дейилган консуллик маълумотида.

Россияда коронавирус билан касалланишнинг илк ҳолатлари январь охирида Тюмень вилояти ва Байкалорти ўлкасида кузатилган, иккала бемор ҳам Хитой фуқаролари бўлганди. Февраль охирида Diamond Princess круиз лайнерида уч нафар россияликда коронавирус кузатилган. Яна бир ҳолат 2 март куни Италиядан қайтган россияликда қайд этилган.