АҚШ агар Эронга таклифни қабул қилса, коронавирус тарқалишига қарши курашишда ёрдам беришга тайёрлигини билдирди. «ТАСС»нинг хабар беришича, бу ҳақда Дональд Трамп 4 март куни намойиш этилган Fox News телеканалига берган интервьюсида маълум қилган.
Унда Трамп АҚШ коронавирусга қарши курашишни жуда яхши эплашини, бу борада яхши жамоа тузилгани, вице-президент Майк Пенс ўз ишини яхши бажараётганини айтган. «Мен уни бу жамоага бош қилиб қўйдим. Бизда дунёдаги энг яхши шифокорлар бор», — деган Трамп.
Шунингдек, АҚШ коронавирусга қарши курашишда бошқа кўплаб давлатларга ёрдам бераётганини таъкидлаган. Агар Эрон рози бўлса, уларга ҳам ёрдам беришини билдириб, «Улар жуда жиддий жабрланди», деб айтган.
АҚШ аввал ҳам коронавирусга қарши курашда Эрон ҳукуматига ёрдам таклиф қилган, Теҳрон эса Вашингтоннинг бу ёрдамини рад этиб, уни тарғибот иши деб ҳисоблаганди. Шундан сўнг Эрон эпидемияга қарши курашда Россиядан ёрдам сўради.
Сўнгги маълумотларга кўра, Эронда коронавирус юқтирганлар сони 2300 кишидан ошди. Вирус сабабли Эроннинг барча вилоятлардаги маъмурий марказларида жума намозлари расман бекор қилинди.
Аввалроқ Ўзбекистон Хитойга гуманитар ёрдамнинг иккинчи партиясини юборгани, Хитой эса коронавирусга қарши курашишда Жанубий Кореяга гуманитар ёрдам юбормоқчи эканлиги хабар берилган эди.
Изоҳ (0)