Хитой ҳукумати янги турдаги коронавирус эпидемияси тарқалишига қарши курашиш учун яқин кунларда Жанубий Кореяга гуманитар ёрдам партиясини юборади. «РИА Новости»нинг хабар беришича, бу ҳақда Хитой ташқи ишлар вазири ўринбосари Ма Чаосюй маълум қилган.
«Хитой ҳукумати яқин орада Жанубий Кореяга шошилинч тиббий буюмларнинг бир қисмини етказиб беради. Маҳаллий ҳокимиятлар ва корхоналар Жанубий Кореяга ёрдам беришга тайёргарлик кўрмоқда, яқин келажакда бу борадаги сай’-ҳаракатларни кучайтирамиз», — деган у.
Ма Чаосюй Хитой Жанубий Кореядаги қийинчиликларни ўзинкидек ҳисоблашини, шу сабабли уларга ҳар қандай инсонпарварлик ёрдамини беришга тайёрлигини таъкидлаган.
У, шунингдек, томонлар эпидемияни олдини олиш бўйича ҳамкорликда иш олиб бориш имкониятини муҳокама қилаётганини ҳам айтган. «Чунки вируснинг тарқалишига қарши кураш биргаликдаги ҳаракатларни талаб қилади, фақат шундагина бу ҳаракатлар самарали бўлиши мумкин», — деган Ма Чаосюй.
Эслатиб ўтамиз, Президент Шавкат Мирзиёевнинг фармойишига мувофиқ Ўзбекистон коронавирус янги турининг кенг тарқалишини олдини олиш, эпидемиологик вазиятни жиловлаш ҳамда уни маҳаллийлаштириш, касалликка қарши кураш ҳаракатларни қўллаб-қувватлаш мақсадида 12 февраль куни Хитойга инсонпарварлик ёрдамини жўнатган эди. 3 март куни эса Ўзбекистон Хитойга гуманитар ёрдамнинг иккинчи партиясини юборди.
Хитойда 4 март ҳолатига кўра, янги турдаги COVID-19 коронавируси оқибатида 31 киши вафот этди. Мамлакат ҳудудида ушбу касаллик билан вафот этганларнинг жами сони 3 мингдан ошиб кетди. Испанияда коронавирус билан касалланганлар сони 200 нафарга етди. Италияда COVID-19 коронавируси оқибатида ўлганлар сони 100 нафардан ошди, АҚШнинг Вашингтон штатида ҳам коронавирусдан вафот этганлар сони кўпайди.
Тожикистонда коронавирус эпидемияси хавфи туфайли масжидлар жамоат намозларини ўқиш учун вақтинча ёпиб қўйилди, Ўзбекистонда эса коронавирус тарқалганини рад этган ССВ аҳолини касалликдан ҳимояланишга ундовчи SMSлар жўната бошлади.
Изоҳ (0)