Сингапур ҳукумати 3 март куни Turkish Airlines’нинг ТК54 рейси билан Истанбулдан учиб келган йўловчилардан бирида коронавирус аниқланганини тасдиқлади. Бу ҳақда мамлакат транспорт вазирлиги маълумотларига асосланиб, «РИА Новости» хабар берди.
Қайд этилишича, бемор билан алоқада бўлган бошқа йўловчилар ҳам назоратга олинган.
Ҳозирга қадар Туркияда коронавирус аниқланмади. Сингапурда эса 100 дан ортиқ киши вирусни юқтириб олган.
«Сингапур соғлиқни сақлаш вазирлиги 4 март куни кечқурун Туркиядан учиб келган йўловчида COVID-19 коронавируси аниқланганини тасдиқлади», — дейилади хабарда.
Хабарда айтилишича, 4 март куни Истанбулга учиши керак бўлган ТК55 рейси белгиланган вақтда парвозни амалга оширмаган.
Сингапур транспорт вазирлиги, фуқаро авиацияси бошқармаси ва аэропорт ҳукумати авиакомпания ва йўловчилар билан доимий алоқада эканлиги айтилмоқда.
Хитойда 4 март ҳолатига кўра, янги турдаги COVID-19 коронавируси оқибатида 31 киши вафот этди. Мамлакат ҳудудида ушбу касаллик билан вафот этганларнинг жами сони 3 мингдан ошиб кетди.
Аввалроқ Венгрия, Латвия, Марокаш, Австралия, Арманистон ва Россияда коронавирусга чалинишнинг илк ҳолатлари қайд этилгани ҳақида хабар берилган эди.
Изоҳ (0)