2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Илм, маърифат ва рақамли иқтисодиётни ривожлантириш йили»да амалга оширишга оид давлат дастури тасдиқланди.
Ҳужжат билан бу борадаги чора-тадбирлар режаси ишлаб чиқилади. Режада Ўзбекистонда юкларнинг авиа ва автоташувларига ихтисослашган қўшма транспорт логистика компанияларини ва қуруқ портларни ташкил этиш ва бунинг учун дунёдаги етакчи транспорт компанияларини жалб қилиш бўйича чора-тадбирларни амалга ошириш белгиланган.
Шунингдек, Ўзбекистон томонидан Умумий имтиёзлар плюс (GSP+) тизими доирасида Европа иттифоқининг имтиёзларини олиш масаласини ўрганиш кўзда тутилган.
2020 йил 1 октябрга қадар чора-тадбирлар дастури ишлаб чиқилади. Дастурда Ўзбекистонни GSP+ фойда олувчи мамлакатлар рўйхатига киритиш тўғрисидаги ҳужжатлар тўпламини Европа томони учун тайёрлаш ва тақдим этиш, Ўзбекистонни GSP+ фойда олувчи мамлакатлар рўйхатига киритиш бўйича Ўзбекистон ҳукуматидан мувофиқлаштирувчини тайинлаш назарда тутилган.
Халқаро экспертларнинг хулосасига кўра, Ўзбекистон транзит салоҳиятини ҳозирги 7 миллион тоннадан 16 миллион тоннага, 2030 йилда эса минтақавий лойиҳаларни амалга ошириш эвазига 23 миллион тоннага етказиш имконияти мавжуд. Қайд этиш жоиз, Жаҳон банкининг логистика рейтингида Ўзбекистон 163 та давлат орасида 99-ўринда бўлиб, халқаро ташувларни амалга оширишнинг соддалиги бўйича 120-ўринда қайд этилган.
Изоҳ (0)