Қорақалпоғистонда камчиликларни расмийлаштирмаслик эвазига 2,5 миллион сўм пора талаб қилган бандликка кўмаклашиш маркази инспектори қўлга олинди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, Мўйноқ туманида тери-таносил касалликлари диспансерида меҳнат қонунчилигига риоя қилиниши юзасидан ўтказилган текшириш натижасида хато ва камчиликларни аниқланган.
Мўйноқ тумани аҳоли бандлигига кўмаклашиш маркази инспектори Ш.Б. ушбу камчиликларни расмийлаштирмаслик ҳамда диспансер мансабдор шахсларига нисбатан қонуний чора кўрмаслик эвазига хизмат мавқейидан фойдаланиб, тамагирлик йўли билан ҳисобчи Б.Қ.дан 2,5 миллион сўм пора талаб қилган.
Шундан 2 миллион сўмни олган вақтида департаментнинг Қорақалпоғистон Республикаси бошқармаси томонидан республика прокуратураси ҳамда ИИВ ходимлари ҳамкорлигида ўтказилган тезкор тадбирда қўлга олинган.
Мазкур ҳолат юзасидан Ш.Б.га нисбатан Жиноят кодексининг тегишли моддаси билан жиноят иши қўзғатилиб, тергов ҳаракатлари ўтказилмоқда.
Аввалроқ Наманганда сохта ДХХ ходимларининг бир фуқарони қўрқитиб, 150 минг доллар пулни олиб қўйгани фош бўлгани ҳақида хабар берилган эди.
Изоҳ (0)