«Xorazm xususiy bandlik agentligi» ҳамда «The Empire xususiy bandlik agentligi» МЧЖларга Ўзбекистон Республикасидан ташқарида иш излаётган шахсларни ишга жойлаштириш фаолияти билан шуғулланиш учун берилган лицензиянинг амал қилиши вақтинчалик тўхтатилди. Бу ҳақда Ўзбекистон Бандлик ва меҳнат муносабатлари вазирлиги маълум қилди.
Қайд этилишича, Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигига «Xorazm xususiy bandlik agentligi» МЧЖ фаолияти устидан кўплаб фуқаролардан шикоят аризалари келиб тушган.
Шу муносабат билан, Бандлик ва меҳнат муносабатлари вазирлиги Ўзбекистон Республикаси Вазирлар Маҳкамасининг 2018 йил 12 сентябрдаги қарори асосида тасдиқланган «Ўзбекистон Республикасидан ташқарида иш излаётган шахсларни ишга жойлаштириш бўйича фаолиятини лицензиялаш тартиби тўғрисидаги низомининг» 45-бандига мувофиқ, «Xorazm xususiy bandlik agentligi» ҳамда «The Empire xususiy bandlik agentligi» МЧЖ лицензиясининг амал қилишини 10 иш кунига тўхтатиш тўғрисида қарор қабул қилди.
Таъкидланишича, 10 кун давомида «Xorazm xususiy bandlik agentligi» ҳамда «The Empire xususiy bandlik agentligi» МЧЖ томонидан низомнинг 46-бандига биноан келтирилган ҳолатларни ижобий ҳал қилиш талаб қилинади.
Эслатиб ўтамиз, аввалроқ International Job Organization хусусий бандлик агентлигининг Хоразм ва Андижондаги ходимларининг фирибгарликлари фош этилди. Consort хусусий бандлик агентлигига Ўзбекистондан ташқарида иш излаётган шахсларни ишга жойлаштириш фаолияти билан шуғулланиш учун берилган лицензиянинг амал қилиши вақтинчалик тўхтатилди.
Бундан ташқари, Сурхондарёда «И.Ж.О.» хусусий бандлик агентлигнинг фуқароларни 2,6 миллиард сўмга чув туширгани аниқланди. Ўзбекистонликларни 24 миллиард сўмга чув туширган Korean and migrations хусусий бандлик агентлигининг жиноий иши бўйича тергов тафсилотлари маълум бўлди. МИБ Human хусусий бандлик агентлигидан жабр кўрганларга зарарларни қайтаришни бошлади.
Изоҳ (0)