Соғлиқни сақлаш вазирлиги Мактабгача таълим вазирлиги билан қўшма қарор қабул қилиб, Ўзбекистондаги барча боғчаларда коронавирус инфекциясининг профилактикаси ва назорати бўйича чора-тадбирларни кучайтириш, тегишли санитария чораларини амалга ошириш орқали болалар саломатлигини муҳофаза қилишни белгилади. Бу ҳақда ССВ матбуот хизмати хабар бермоқда.
Ушбу ҳужжатга асосан, эндиликда боғчаларда масъул ходимлар иштирокида эрталабки филтрни ташкил этиш, ўткир респиратор касаллик белгилари аниқланганда тарбияланувчиларни алоҳидалаш ҳамда зудлик билан ота-онасига ва ҳудудий поликлиникага хабар бериш, болаларнинг қўлларини тез-тез совун билан ювиши, шахсий гигиена қоидаларига қатъий риоя қилиниши бўйича доимий огоҳлантириш ишлари олиб борилади.
Шунингдек, боғчаларда хоналарни шамоллатиш, доимий равишда дезинфекция воситалари ёрдамида кундалик тозалов ишларини олиш бориш, тозалик ҳамда дезинфекция тадбирларини кучайтириш, муассасадаги тиббиёт хоналарини зарур тиббий асбоб-ускуналар, зарарсизлантирувчи воситалар ҳамда дори-дармонлар билан таъминлаш каби профилактик тадбирларни қатъий амалга ошириш кўрсатиб ўтилган.
Шу билан бирга, дунёдаги эпидемик вазият барқарорлашгунга қадар халқаро ва оммавий тадбирларни ўтказмаслик, чет эл фуқаролари ва хорижда бўлган фуқароларни мактабгача таълим муассасасига вақтинча ишга қабул қилмаслик ва уларнинг фарзандларини эса карантин даври тугамагунча боғчага олмаслик каби қатъий чораларни кўриш ҳам мазкур ҳужжатда акс этган.
Санитария-гигиена, эпидемияга қарши ва дезинфекция тадбирларининг бажарилиши бўйича ҳар бир мактабгача таълим муассасасининг раҳбари шахсан жавобгар эканлиги огоҳлантирилган.
Эслатиб ўтамиз, коронавирус билан боғлиқ эпидемия кун сайин ўсиб бормоқда. Жаҳон соғлиқни сақлаш ташкилоти маълумотларига кўра, айни пайтда дунё миқёсида коронавирус билан хасталанганлар сони 93 минг нафардан ошган. Уларнинг 80 400 нафардан зиёди Хитойда бўлса, қолган 12 700 нафардан ортиғи дунёнинг 77 та мамлакатида қайд этилган. Айни пайтгача касалланганларнинг 51 минг нафарга яқини соғайиб кетгани маълум қилинмоқда.
Бундан аввал Ўзбекистондаги барча барча таълим муассасаларида коронавирусга қарши чоралар кучайтирилиши, коронавирус хавфи сабаб Ўзбекистондаги ўқитувчи ва талабаларнинг хорижга чиқиши чегаралангани хабар берилган эди.
Изоҳ (0)