Ўзбекистон Президенти Шавкат Мирзиёев 2 март, душанба куни, мамлакатда амалий ташриф билан бўлиб турган Хитой Халқ Республикаси Коммунистик партияси Марказий қўмитаси Сиёсий бюроси аъзоси, Ташқи ишлар бўйича комиссия девонхонаси раҳбари Ян Цзечи бошчилигидаги делегацияни қабул қилди. Бу ҳақда Президент матбуот хизмати хабар берди.
Маълум қилинишича, давлат раҳбари бугунги кунда Ўзбекистон ва Хитойни дўстлик ҳамда ҳар томонлама стратегик шериклик муносабатлари яқиндан боғлаб турганини қайд этди.
Мамлакатлар етакчиларининг мунтазам учрашувлари икки томонлама ҳамкорликни сифат жиҳатидан янги даражага кўтариш, уни аниқ мазмун билан бойитиш имконини берди.
Биргаликдаги саъй-ҳаракатлар туфайли ўзаро товар айирбошлаш ҳажми изчил ортиб бормоқда. Хитойнинг илғор компаниялари ва молиявий институтлари иштирокида Ўзбекистонда йирик инвестиция лойиҳалари амалга оширилмоқда. Маданий-гуманитар алмашинувлар кенгаймоқда.
Юқори мартабали меҳмон Президентга самимий қабул учун миннатдорлик билдириб, ХХР раиси Си Цзиньпиннинг Ўзбекистон Президенти номига йўлланган шахсий мактубини топширди. Ушбу мактубда кейинги йилларда икки томонлама ҳамкорликда юксак даражага эришилгани катта мамнуният билан қайд этилган ҳамда янги турдаги коронавирус тарқалишига қарши курашда кўрсатилаётган кўмак учун миннатдорлик билдирилган.
Мавзуга доир: Си Цзиньпин коронавирусга қарши курашда Хитойга кўрсатилган ёрдам учун Шавкат Мирзиёевга миннатдорлик билдирди
Учрашувда кўп қиррали Ўзбекистон—Хитой шериклигининг долзарб масалалари муҳокама қилинди.
Ўзбекистонда энергетика, нефть-газ, кимё, тўқимачилик, қишлоқ хўжалиги ва иқтисодиётнинг бошқа тармоқларида ҳамда инфратузилмани модернизация қилиш бўйича устувор лойиҳаларни биргаликда ишлаб чиқиш ва амалга оширишни давом эттириш зарурлигига алоҳида эътибор қаратилди.
Шунингдек, халқаро ва минтақавий аҳамиятга молик долзарб масалалар, Бирлашган Миллатлар Ташкилоти, ШҲТ ва бошқа тузилмалар доирасидаги конструктив мулоқотни мустаҳкамлаш, шунингдек, «Бир макон, бир йўл» ташаббусини илгари суриш доирасидаги ҳамкорлик юзасидан фикр алмашилди.
Эслатиб ўтамиз, Ўзбекистон 12 февраль куни Хитойга коронавирусга қарши курашиш учун гуманитар ёрдам юборган эди.
Изоҳ (0)