Хитой Соғлиқни сақлаш миллий комиссиясининг маълум қилишича, мамлакатда сўнгги бир сутка ичида коронавирусни юқтириб олганлар сони 427 кишига ортган. Бу ундан олдинги кунга нисбатан 100 кишига кўп демакдир.
Шу билан бирга, Хубэй провинциясидан ташқари тўрт кишидагина вирус аниқланган бўлиб, бу сўнгги ҳафталардаги энг паст кўрсаткич ҳисобланади.
Ўтган бир сутка давомида коронавирус оқибатида вафот этганлар сони 47 кишини ташкил этди. Уларнинг 45 нафари Хубэй провинцияси, қолган икки нафари эса Хенан ва Пекин провинциялари ҳисобига тўғри келмоқда.
Касалликдан даволанишга муваффақ бўлган 2885 кишига бир вақтнинг ўзида шифохонадан жавоб берилган. Бутун дунё бўйлаб коронавирус билан касалланганлар сони 85 мингдан ошиб кетди, 36 мингдан ортиқ одам даволанишга эришган.
Жанубий Корея ҳукуматининг маълум қилишича, охирги 24 соат давомида 594 кишида коронавирус аниқланган. Мамлакат бўйлаб касалликни юқтириб олганлар осни 2931 кишини ташкил этмоқда.
Европа давлатларида коронавирус энг кўп қайд этилган мамлакат — Италия (888 нафар бемор). Эронда 388 кишида вирус аниқланган бўлса, Японияда беморлар сони 226 нафарга етган. Эроннинг Ватикандаги собиқ элчиси коронавирус туфайли вафот этган.
Изоҳ (0)