АҚШ фонд бозори 28 февраль, жума куни, очилганидан кейин котировкаларда кескин пасайиш давом этди. S&P 500’нинг индекси 3,09 фоизни ташкил қилди, Dow Jones индекси эса 3,52 фоизга тушди. Россияда бундан ҳам ёмонроқ ҳолат қайд этилган. Москва биржасида пасайиш 4,98 фоизни ташкил қилмоқда, РТС доллар индекси эса 6,5 фоизга тушган. Бу ҳақда The Bell хабар берди.
Қайд этилишича, агар АҚШ биржалари индексларининг пасайиши шу суръатда давом этса, бозорнинг ҳафталик пасайиши 14 фоиздан ошади. Бу 2008 йилдан бери АҚШдаги энг ёмон ҳафта бўлади. Ғазначилик облигациялари бўйича даромадлар навбатдаги тарихий минимумга тушди.
Bloomberg агентлигининг ёзишича, фонд бозорида пасайиш асосан коронавирус тарқалишининг олдини олиш чоралари компаниялар ва иқтисодиётнинг ўсишига тўсқинлик қилади, деган қўрқувлар билан боғлиқ.
Мавзуга доир: Коронавирус сабабли жаҳон ялпи ички маҳсулотининг йўқотишлари 1 трлн долларга етиши мумкин
Бозорлардаги пасайиш нафақат АҚШда, балки бутун дунёда кузатилмоқда. Баъзи биржаларда пасайиш 10 фоиз ёки ундан кўпроққа тенг бўлган. Европадаги қимматли қоғозлар қийматининг пасайиши 2019 йил август ойидаги даражага етган. Stoxx Europe 600 биржасида индекс 3,5 фоизга, Германиянинг DAX биржасида эса 3,9 фоизга тушди.
Маълумот учун, коронавирус туфайли дунёнинг энг бой одамлари бир кунда 139 миллиард доллар йўқотди, Ўзбекистоннинг асосий экспорт маҳсулоти — олтиннинг нархи рекорд даражада кўтарилди. Samsung коронавирус билан касалланган ходим сабабли Жанубий Кореядаги корхоналаридан бирини ёпди. Аввалроқ миллиардер Уоррен Баффетт коронавируснинг тарқалиши ва унинг жаҳон бозорига таъсири ҳақида фикр билдирган эди. Moody’s рейтинг агентлиги вируснинг 2008—2010 йиллардаги молиявий инқироздан кўра жиддийроқ оқибатларга олиб келиши мумкинлиги тўғрисида огоҳлантирган.
Изоҳ (0)