2019 йилда Хитойда АҚШдагига нисбатан деярли уч баравар кўп янги миллиардерлар пайдо бўлган, дейилади Hurun тадқиқотлар компанияси ҳисоботида. Экспертларнинг ҳисоб-китобларига кўра, Хитойда (Гонконг ва Тайванни ҳам қўшиб ҳисоблаганда) 2020 йил 31 январь ҳолатига кўра, миллиардерларнинг умумий сони 799 тани ташкил этган ва 182 тага кўпайган. Бу ҳақда «РБК» хабар берди.
АҚШда эса 2019 йилда 59 нафар янги миллиардер пайдо бўлди ва уларнинг умумий сони 626 нафаргача ўсди.
Ҳисоботга кўра, Пекин миллиардерлар сони бўйича етакчи пойтахт сифатидаги ўрнини сақлаб қолган, бу ердаги жами бойвуччалар сони 110 нафарни ташкил қилади. Нью-Йоркда экспертларнинг қайд этишига кўра, 98 нафар миллиардер истиқомат қилади. Шэньчжэндаги миллиардерлар сони 75, Гуанчжоудаги бойлар эса — 45 нафар.
Hurun Report маълумотларида, Шанхай илк бора миллиардерлар сони бўйича Гонконгдан ўзиб кетди: у ерда бир йил ичида 17 нафар янги миллиардер пайдо бўлган, Хитойнинг махсус административ ҳудудидаги натижа эса — етти нафар миллиардер (умумий сон мос равишда 83 ва 76 нафар миллиардерни ташкил этган).
Reuters’нинг ёзишича, коронавируснинг тарқалиши дунёдаги энг катта иккинчи иқтисодиётга зарба берди, бироқ фармацевтика бозори иштирокчиси бўлган Хитой компанияларининг акциялари қимматлашишига ҳам олиб келди, шунингдек, онлайн таълим ва онлайн-ўйинлар йўналишидагилар ҳам бойиб қолган. Карантин ва айрим шаҳарлар ҳудудида кўчаларга чиқиш тақиқлаб қўйилгани туфайли онлайн-хизматларга бўлган талаб сезиларли даражада ошди, бу Baidu қидирув тизими директори Робин Лининг бойлиги кўпайишига хизмат қилган. У ишга туширган iQiyi видеоплатформасининг акциялари тадқиқот даврида 8 фоизга ўсган.
Мавзуга доир:
Hurun Report'нинг глобал рейтингини Amazon асосчиси Жефф Безос (140 миллиард доллар) бошқармоқда, иккинчи ўринда Louis Vuitton Moët Hennessy компаниялар гуруҳи раҳбари Бернар Арно (107 миллиард доллар), учинчи поғонада эса Microsoft асосчиси Билл Гейтс (106 миллиард доллар) бормоқда. Хитой вакиллари асосий ўнликка кира олмаган. Alibaba асосчиси Жек Ма (45 миллиард доллар) рўйхатда 21-ўринда қайд этилган.
Россия ушбу тадқиқотлар натижасида дунёда миллиардерлар сони бўйича 6-ўринда кўрсатилган (91 нафар), шундан 72 нафари пойтахт Москвада яшайди.
Изоҳ (0)