Тошкент шаҳридаги «Y.C.» компанияси мансабдор шахслари ва бошқалар жиноий фаолиятдан олинган даромадларига қонуний тус беришга урингани аниқланди, дея хабар бермоқда Бош прокуратура матбуот хизмати.
Департаментнинг Тошкент шаҳар бошқармаси томонидан ўтказилган терговга қадар текширувда аниқланишича, компания мансабдорлари 2019 йилда 2,4 миллиард сўмлик харидоргир товарларни нақд пулга сотиб, фаолияти бўйича ҳисобот топширмай, 471,7 миллион сўм миқдоридаги қўшилган қиймат солиғини тўламаган.
Бош прокуратура ахборотида қўшимча қилинишича, гумон қилинувчилар «жиноий фаолиятдан олинган даромадларига қонуний тус бериш мақсадида бошқа янги корхоналарни ташкил этиб, уларнинг низом жамғармаларини ноқонуний даромадлари ҳисобидан шакллантирган».
Қайд этишларича, мазкур ҳолат юзасидан Жиноят кодексининг тегишли моддалари билан жиноят иши қўзғатилган, тергов ҳаракатлари ўтказилмоқда.
Изоҳ (0)