Россия Совет иттифоқининг вориси бўлиб, собиқ СССРнинг барча республикаларига тегишли ташқи активлар эвазига уларнинг қарзларини тўлашни ўз зиммасига олган. Бу ҳақда Россия президенти Владимир Путин конституцияга ўзгартириш киритиш устида ишлаётган ишчи гуруҳ билан бўлиб ўтган учрашувда маълум қилди, деб хабар беради «РБК».
Путиннинг сўзларига кўра, Россия СССРнинг ворисига айланиб, собиқ республикалар қарзини бўйнига олганида бутун дунё хурсанд бўлган.
«Адашмаётган бўлсам, Украинанинг ўзи учун 16 миллиард тўладик», — дейди Путин. Президентнинг таъкидлашича, барча кредитлар ёпиб бўлинган, собиқ Совет иттифоқига аъзо бўлган давлатларнинг ташқи активлари қайта шаклланган бўлса-да, Россияга берилмади.
1993 йили Россия собиқ совет республикаларининг ташқи қарзини тўлаш мажбуриятини зиммасига олган. Бунинг эвазига улар Совет иттифоқининг ташқи активларидаги улушларидан воз кечган. 1994 йилнинг январь ойидаги маълумотларга кўра, собиқ СССРнинг қарзи 105,5 миллиард долларни ташкил этган, қарийб 50 миллиард доллар қарз Париж кредиторлар клубидан бўлган. Россия 2006 йилда ушбу қарзини муддатидан олдин узди. 2017 йилнинг августида эса Россия собиқ СССРнинг ташқи қарзи бўйича сўнгги бор Босния ва Герцоговинага 125,2 миллион доллар тўлади.
Изоҳ (0)