Rossiya Sovet ittifoqining vorisi bo‘lib, sobiq SSSRning barcha respublikalariga tegishli tashqi aktivlar evaziga ularning qarzlarini to‘lashni o‘z zimmasiga olgan. Bu haqda Rossiya prezidenti Vladimir Putin konstitutsiyaga o‘zgartirish kiritish ustida ishlayotgan ishchi guruh bilan bo‘lib o‘tgan uchrashuvda ma’lum qildi, deb xabar beradi “RBK”.
Putinning so‘zlariga ko‘ra, Rossiya SSSRning vorisiga aylanib, sobiq respublikalar qarzini bo‘yniga olganida butun dunyo xursand bo‘lgan.
“Adashmayotgan bo‘lsam, Ukrainaning o‘zi uchun 16 milliard to‘ladik”, — deydi Putin. Prezidentning ta’kidlashicha, barcha kreditlar yopib bo‘lingan, sobiq Sovet ittifoqiga a’zo bo‘lgan davlatlarning tashqi aktivlari qayta shakllangan bo‘lsa-da, Rossiyaga berilmadi.
1993-yili Rossiya sobiq sovet respublikalarining tashqi qarzini to‘lash majburiyatini zimmasiga olgan. Buning evaziga ular Sovet ittifoqining tashqi aktivlaridagi ulushlaridan voz kechgan. 1994-yilning yanvar oyidagi ma’lumotlarga ko‘ra, sobiq SSSRning qarzi 105,5 milliard dollarni tashkil etgan, qariyb 50 milliard dollar qarz Parij kreditorlar klubidan bo‘lgan. Rossiya 2006-yilda ushbu qarzini muddatidan oldin uzdi. 2017-yilning avgustida esa Rossiya sobiq SSSRning tashqi qarzi bo‘yicha so‘nggi bor Bosniya va Gersogovinaga 125,2 million dollar to‘ladi.
Izoh (0)