2019 йил декабрида бўлиб ўтган қуръа Европа Чемпионлар Лигаси 1/8 финалидаёқ бир нечта супер тўқнашувларни тақдим этиши маълум бўлиб улгурганди. ПСЖ—«Боруссия Д», «Челси»—«Бавария», «Атлетико»—«Ливерпуль», «Наполи»—«Барселона» ва албатта «Реал»—«Манчестер Сити» шулар жумласидан.
Мухлислар ушбу ўйинлардан 4 тасининг гувоҳи бўлиб улгурди. Юқорида тилган олинган сўнгги беллашув эса 26 февраль, чоршанба оқшомида Мадридда бўлиб ўтади.
Унда Зинедин Зидан бошчилигидаги «Реал» Хосеп Гвардиола қўл остидаги «Манчестер Сити»ни қабул қилади. Келинг учрашувга оид маълумотлар билан биргаликда танишиб чиқамиз.
Мусобақа йўли
«Реал»«Реал» гуруҳ босқичида ПСЖ, «Брюгге» ва «Галатасарой» клублари билан плей-офф йўлланмаси учун кураш олиб борди. Мадридликлар фақат учинчи турга келиб, ўзининг мусобақа жорий мавсумидаги илк ғалабасини қўлга киритди. У ҳам бўлса «Галатасарой» устидан минимал ҳисобда. Зидан шогирдари дастлабки икки турда — аввалига ПСЖга йирик ҳисобда мағлуб бўлди, кейин эса «Брюгге» билан 2:2 ҳисобида дуранг қайд этди. Кейин эса турклар кетма-кет 2 та ўйинда мағлуб этилди. «Брюгге» сафарда 3:1 ҳисобида таслим қилинди. Сўнгги турда ПСЖ билан 2:2 ҳисобида дуранг қайд этилди. Шу тариқа Зидан шогирдлари гуруҳ босқичини ПСЖдан сўнг 2-ўринда якунлаб, плей-офф босқичига йўл олди.
«Манчестер Сити»
«Манчестер Сити» мусобақанинг «C» гуруҳида плей-офф йўлланмаси учун «Аталанта», «Динамо З» ва «Шахтёр» билан курашга киришди. «Сити» гуруҳ босқичини мағлубиятсиз якунлади. Дастлабки уч турда «Шахтёр», «Динамо» ва «Аталанта» умумий ҳисобда 10:1 ҳисобида мағлуб этилди. Гуруҳдан чиқиш масаласи ижобий ҳал этилгач, Гвардиола шогирдлари 4 ва 5-турда дуранг қайд этди. Сўнгги турда эса «Динамо» сафарда 4:1 ҳисобида тор-мор этилди. Манчестер клуби 14 очко тўплаган ҳолда 1-ўрин билан плей-офф йўлланмасини қўлга киритди.
Жамоаларнинг айни дамдаги ҳолати
«Реал»Зидан шогирдлари сўнгги ўйинларда оқсаб қолди. Жамоа иккита ўйинда мағлуб бўлди, камига аутсайдер клуб билан дуранг қайд этди. Бу эса «Барселона»га қўл келиб, «Реал»дан Ла Лига пешқадамлигини тортиб олди. «Реал» сўнгги 4 та ўйинда ўз дарвозасидан 8 та гол олиб чиқди. Бунгача клуб Ла Лиганинг 21 та ўйинида атиги 9 та гол ўтказганди. Фарқ яққол кўриниб турибди. Бироқ шуни ҳам унутмаслик керак, «Реал»га сўнгги ўйинларда гол урган жамоаларнинг ҳужум чизиғи «Манчестер Сити»никичалик қўрқинчли эмасди.
«Манчестер Сити»
Гвардиола жамоаси ҳам сўнгги ойларни бир маромда ўтказа олаётгани йўқ. Жумладан, «Тоттенҳэм» ҳамда «Манчестер Юнайтед»дан қабул қилинган мағлубиятлар «Сити»да ҳам етарлича муаммолар борлигини кўрсатиб қўйди. Бироқ «шаҳарликлар» бу муаммоларни сўнгги 2 та ўйиндаги «қуруқ» ғалабалар орқали ёпишга эришгандек бўлди. Жумладан, АПЛда иккинчи ўрин учун курашаётган тўғридан-тўғри рақобатчиси «Лестер» таслим этилди. Фақат «Сити»да «Реал»га қараганда битта катта муаммо бор. УЕФА «шаҳарликлар»ни Чемпионлар Лигасининг келаси икки мавсумидан четлатди. Бунинг барчасига молиявий фейр-плейга амал қилинмагани сабаб қилиб кўрсатилган. «Сити» раҳбарияти 26 февраль куни ушбу қарор юзасидан Халқаро арибтраж судига шикоят қилганини маълум қилди.
Қайд этиш жоиз, «Реал» ҳам «Манчестер Сити» ҳам ички чемпионатда иккинчи ўриндан жой олиб турибди. Фарқи шуки, «Реал» пешқадам «Барселона»дан 2 очкога, «Сити» эса «Ливерпуль»дан 22 очкога ортда қолмоқда.
Жамоадаги йўқотишлар
«Реал»Мадрид клуби «Сити»га қарши баҳс олдидан сезиларли йўқотишга учради. Узоқ танаффусдан сўнг сафга қайтган Эден Азар «Леванте»га қарши баҳсда яна жароҳат олди. Эден эски жароҳатини қайталаб олгани айтилди. Энди белгиялик футболчи нафақат «Сити»га қарши баҳсни, балки 1 март куни «Сантьяго Бернабеу»да ўтадиган «Барселона»га қарши ўйинни ҳам ўтказиб юборади. Марко Асенсио ҳам жароҳат сабаб «Реал»га ёрдам бера олмайди. Шунингдек, мураббий қарорига кўра, Хамес Родригес, Мариано Диас, Браим Диас, Начо ва Родриголар «Сити»га қарши «Реал»нинг ўйин қайдномасидан ўрин олмаган.
«Манчестер Сити»
«Реал»га қарши баҳс олдидан Раҳим Стерлингнинг жароҳат олгани айтилганди. Бироқ футболчи ўйин қайдномасидан ўрин олган. Фақатгина узоқ муддатга сафдан чиққан Лерой Саненинг «Реал»га қарши майдонга тушмаслиги аниқ. Гвардиоланинг ўйин схемасида муҳим ўрин тутадиган Аймерик Ляпортнинг сафга қайтгани эса «шаҳарлик» мухлисларни хурсанд қилгани бор гап. Умуман олганда, Гвардиола жамоасида таркиб борасида катта муаммолар йўқ.Ўзаро ўйинлар тарихи
Жамоалар ҳозиргача 6 марта тўқнаш келган. Шулардан 4 та баҳс Чемпионлар Лигаси мусобақасига тўғри келади. Илк бор улар 2012/13 йилги мавсум мусобақанинг гуруҳ босқичида учрашган. Мадридда ўтган баҳсда «Реал» «Сити» 3:2 ҳисобида енгган бўлса, Манчестердаги ўйин 1:1 ҳисоби билан якунига етган. 2015 йил клублар Халқаро Чемпионлар Кубоги доирасида Австралияда ўйин ўтказган. Унда «Реал» рақибини 4:1 ҳисобида мағлуб этган. Чемпионлар Лигасининг 2015/16 йилги мавсумида эса томонлар ярим финалда ўзаро тўқнаш келган. «Этиҳад Стадиум»даги баҳс 0:0 кўринишда якунланган. «Сантьяго Бернабеу»да эса «Реал» «Сити»дан 1:0 ҳисобида устун келган. Улар ўртасидаги ҳозирча сўнггиси бўлиб турган ўйин Халқаро Чемпионлар Кубоги доирасида 2017 йил 26 июлида АҚШда бўлиб ўтган. Унда «Сити» «Реал»ни 4:1 ҳисобида тор-мор қилган.Ўйинолди фикрлар
«Футболда энг асосийси — натижа. Жамоа сўнгги ҳафталар деярли ўзгаргани йўқ. «Леванте»га қарши баҳсда яхши ўйин кўрсатдик, фақат гол ура олмадик. «Манчестер Сити»га қарши баҳс эса ўзимизни кўрсатиш учун имконият ҳисобланади. Ўзимизни аяшга вақт йўқ. Натижалар ўзи келади. Бу Зидан—Гвардиола тўқнашув эмас, балки «Реал»—«Манчестер Сити» тўқнашувидир. Одамлар «Сити» ва «Реал» ўртасида томошабоп ўйин кўришни хоҳламоқда. Бу ўзгача ҳафта эканлигини биламиз. Футболчилар бундай ўйинларда иштирок этишдан фахрланади», — дейди Зидан.
«Бу жамоанинг ушбу таркиби учун Чемпионлар Лигасида ғалаба қозониш учун сўнгги имконият эмас. Таркибимиздаги кўплаб ўйинчиларимизда Чемпионлар Лигасида ғалаба қозониш учун кейин ҳам имконият бўлади. Биз катта жамоага қарши ўйнаймиз ва олдинда бизни қандай синов кутиб турганини биламиз. Бу аниқ сўнгги имконият эмас. Нима бўлишини олдиндан айтиб бўлмайди. Ғалаба қозониш хохиши бўлиши керак, бўлмаса ғалаба қозониб бўлмайди. Бироқ бу навбатдаги бир ўйин холос», — дейди Гвардиола.
Тахминий таркиблар
«Реал»: Куртуа, Карвахаль, Ферлан Менди, Рамос, Варан, Каземиро, Кроос, Вальверде, Иско, Бензема, Бэйл
«Манчестер Сити»: Эдерсон, Уокер, Фернандиньо, Ляпорт, Бенжамин Менди, де Брюйне, Родри, Давид Сильва, Бернарду Сильва, Агуэро, Стерлинг.
Асрор Абдуназаров тайёрлади
Изоҳ (0)