Шуҳрат Ғаниевнинг депутат жияни дабдабали тўй ўтказадиган мансабдорларга солинадиган жаримани оширишни таклиф қилди

Олий Мажлиси Қонунчилик палатасининг 25 февраль куни бўлиб ўтган йиғилишида Маъмурий жавобгарлик тўғрисидаги кодексга тўй ва маросимларни ўтказиш тартибини бузганлик учун жарималарни назарда тутувчи қўшимчалар киритиш ҳақидаги қонун лойиҳаси икки ўқишда қабул қилинди.

Тўй-маросимларни ўтказиш тартибини бузиб, жарима тўлаган фуқаролар ва юридик шахслар бир йил давомида такрор белгиланган талабларга риоя қилмаса, улар базавий ҳисоблаш миқдорининг 50 баравари (11,15 миллион сўм) миқдорида жаримага тортилиши назарда тутиляпти.

«Gazeta.uz» мухбирининг хабар беришича, қонун лойиҳаси муҳокамаси чоғида айрим депутатлар жарималар миқдорини янада ошириш зарурлигини таъкидлаган. Хусусан, марғилонлик депутат Дониёр Ғаниев дабдабали тўй ўтказиш тартибини бузиш ҳолати, катта эҳтимол билан, юқори мансабли амалдорлар тарафидан бузилишини таъкидлаган.

«Тартиб самарали ишлаши учун мансабдор шахслар намуна кўрсатиши керак. Чунки дабдабали тўйлар асосан мансабдор шахслар томонидан амалга оширилади ва эътирозларга сабаб бўлади. Қолаверса, бу коррупцияга ҳам боғланади. Шунинг учун тартиббузар тўй эгасига қўйиладиган жазо, яъни жарима миқдори оширилсин», — деди депутат Ғаниев.

Унинг таъкидлашича, ресторан ва кафе эгалари тартибни бир йил ичида иккинчи марта бузгани учун оғирлаштирувчи жазо бор, бироқ учинчи марта бузгани учун оғирлаштирувчи ҳолат назарда тутилмаган. «Ваҳоланки, бу қўшимча 10 миллион сўм харажат бўлиб қолади, холос», — деб қўшимча қилган у.

Маълумот учун, 110-Марғилон сайлов округидан сайланган 31 ёшли Дониёр Авазович Ғаниев Фарғона вилояти ҳокими Шуҳрат Ғаниевнинг жиянидир. У 2012 йилда Британиянинг Охфорд Броокс университетини, 2015 йилда эса ACCA касбий малака курсини тамомлаган, мутахассислиги — бухгалтерия ва ҳисоб-китоб.