Shuhrat G‘aniyevning deputat jiyani dabdabali to‘y o‘tkazadigan mansabdorlarga solinadigan jarimani oshirishni taklif qildi

Oliy Majlisi Qonunchilik palatasining 25-fevral kuni bo‘lib o‘tgan yig‘ilishida Ma’muriy javobgarlik to‘g‘risidagi kodeksga to‘y va marosimlarni o‘tkazish tartibini buzganlik uchun jarimalarni nazarda tutuvchi qo‘shimchalar kiritish haqidagi qonun loyihasi ikki o‘qishda qabul qilindi.

To‘y-marosimlarni o‘tkazish tartibini buzib, jarima to‘lagan fuqarolar va yuridik shaxslar bir yil davomida takror belgilangan talablarga rioya qilmasa, ular bazaviy hisoblash miqdorining 50 baravari (11,15 million so‘m) miqdorida jarimaga tortilishi nazarda tutilyapti.

“Gazeta.uz” muxbirining xabar berishicha, qonun loyihasi muhokamasi chog‘ida ayrim deputatlar jarimalar miqdorini yanada oshirish zarurligini ta’kidlagan. Xususan, marg‘ilonlik deputat Doniyor G‘aniyev dabdabali to‘y o‘tkazish tartibini buzish holati, katta ehtimol bilan, yuqori mansabli amaldorlar tarafidan buzilishini ta’kidlagan.

“Tartib samarali ishlashi uchun mansabdor shaxslar namuna ko‘rsatishi kerak. Chunki dabdabali to‘ylar asosan mansabdor shaxslar tomonidan amalga oshiriladi va e’tirozlarga sabab bo‘ladi. Qolaversa, bu korrupsiyaga ham bog‘lanadi. Shuning uchun tartibbuzar to‘y egasiga qo‘yiladigan jazo, ya’ni jarima miqdori oshirilsin”, — dedi deputat G‘aniyev.

Uning ta’kidlashicha, restoran va kafe egalari tartibni bir yil ichida ikkinchi marta buzgani uchun og‘irlashtiruvchi jazo bor, biroq uchinchi marta buzgani uchun og‘irlashtiruvchi holat nazarda tutilmagan. “Vaholanki, bu qo‘shimcha 10 million so‘m xarajat bo‘lib qoladi, xolos”, — deb qo‘shimcha qilgan u.

Ma’lumot uchun, 110-Marg‘ilon saylov okrugidan saylangan 31 yoshli Doniyor Avazovich G‘aniyev Farg‘ona viloyati hokimi Shuhrat G‘aniyevning jiyanidir. U 2012-yilda Britaniyaning Oxford Brooks universitetini, 2015-yilda esa ACCA kasbiy malaka kursini tamomlagan, mutaxassisligi — buxgalteriya va hisob-kitob.