Ўзбекистонда 25 февралгача 1225 та намуна коронавирус инфекциясига текширилди. Уларда касаллик аниқланмади

Ўзбекистон Республикаси Соғлиқни сақлаш вазирлиги ҳузуридаги Санитария-эпидемиологик осойишталик агентлиги томонидан 25 февраль, сешанба куни, олинган расмий маълумотларга кўра, 2020 йилнинг 24 февраль, душанба куни, Тошкент халқаро аэропортига хорижий давлатлардан 32 та рейс орқали 4430 киши қабул қилинган. Темир йўллар орқали 3 та поездда жами 603 киши, шунингдек, давлат чегара божхона постлари орқали 1815 та автотранспорт воситасининг эгалари ва 31 324 нафар йўловчи мамлакатга кириб келган ва уларнинг барчаси термометриядан ўтказилган.

Маълум қилинишича, 24 февралда Ўзбекистонга келган кишиларнинг 35 нафари Хитой фуқаролари ҳамда 4 нафари Хитойда бўлиб қайтаётган Ўзбекистон фуқаролари бўлган.

Қайд этилишича, коронавирус инфекциясига қарши курашиш тадбирлари давомида эпидемиологик кўрсатмага асосан, 2020 йилнинг 25 февралига қадар жами 1225 та намуна коронавирус инфекциясига текширилди ва коронавирус инфекцияси аниқланмади.

Санитария-эпидемиологик осойишталик агентлигининг коронавирусга қарши марказий штабининг маълум қилишича, 2020 йилнинг 25 февраль ҳолатига кўра, Ўзбекистон Республикасида коронавирус касаллиги қайд этилмади.

Мамлакат аҳолиси ўртасида коронавирус инфекцияси бўйича эпидемиологик барқарорликни таъминлашга йўналтирилган барча профилактик ва эпидемияга қарши тадбирлар Соғлиқни сақлаш вазирлиги ҳузуридаги Санитария-эпидемиологик осойишталик агентлиги томонидан халқаро тиббий санитария қоидалари талаблари асосида амалга оширилмоқда. Мазкур тадбирларда мутасадди вазирликлар, идоралар ва кенг жамоатчилик фаол иштирок этмоқда, дейилади хабарда.

Агентликнинг хабар беришича, дунё бўйича 80 147 киши, Хитойда 77 779 киши коронавирус COVID-19 инфекцияси билан касалланган, кунлик ўсиш 517 кишини ташкил этмоқда. Бу ҳақда агентлик томонидан хабар берилди.

Маълум қилинишича, касалланганларнинг 9126 нафари оғир аҳволда бўлиб, 2666 нафари ушбу касалликдан вафот этган. Касаллик Хитойдан ташқари дунёнинг 36 та давлатида 2368 кишида қайд этилиб, 29 киши вафот этган.

Жанубий Кореяда 977 киши коронавирус билан касалланиб, улардан 10 нафари вафот этган. Италияда 230 та касалланиш ҳолати рўйхатга олиниб, улардан 7 нафари вафот этган. Эронда эса 61 киши касаллик билан зарарланган, улардан 12 нафари қурбон бўлган. Афғонистонда 1 кишининг коронавирус юқтириб олгани аниқланган.

Хитой Соғлиқни сақлаш миллий комиссияси мамлакатда ўтган бир сутка давомида COVID-19 коронавируси оқибатида вафот этганлар 71 кишини (уларнинг аксарияти Хубэй провинциясидан) ташкил этиб, жами вафот этганлар сони 2663 кишига етганини маълум қилди. Қайд қилинишича, Хитойда 24 февраль, душанба куни, вирусни юқтириб олиш бўйича 508 та ҳолат аниқланган, 2589 киши даволанишга муваффақ бўлгани айтилмоқда. Бугунга келиб, инфекциядан жами 27 230 киши даволанган, бутун Хитой бўйлаб 641 минг одам текширувлардан ўтказилган бўлиб, касалликка чалинганлар 77 мингдан ортиқ одамни ташкил қилмоқда.Сўнгги маълумотларга кўра, Эрон соғлиқни сақлаш вазири ўринбосарида коронавирус аниқланди. Баҳрайн коронавирус туфайли Дубай ва Шаржадан авиарейсларни қабул қилишни тўхтатди. Жанубий Кореяда коронавирус билан касалланганлар сони 977 нафарга етди. Францияда коронавирусга чалинган беморлар даволанишга муваффақ бўлди. Японияда давлат идораларига ходимларини уй шароитида ишлашга ўтказиш буюрилди. Испаниянинг Тенерифе оролида коронавирус юқтириб олган меҳмон сабабли ичида минг киши бўлган меҳмонхона изоляция қилинди. АҚШ апрель охиригача коронавирусга қарши вакцинани синовдан ўтказиши мумкинлиги маълум қилинди.