Navoiy viloyatida 22-fevral, shanba kuni, hudud tarixida ilk bor buyrak ko‘chirib o‘tkazish bo‘yicha operatsiyalar amalga oshirildi, deya xabar bermoqda “Xabar.uz”.
Viloyatdagi ko‘p tarmoqli tibbiyot markazi bosh vrachi M.Ahmedov rahbarligida urolog-transplantolog A.Shodiyev, qon-tomir jarrohi A.Safarov, nefrolog Sh.Muhammadiyevdan iborat shifokorlar tomonidan bemorlar operatsiyaga tayyorlangan.
Buyrak ko‘chirish amaliyoti akademik V.Vohidov nomidagi Respublika ixtisoslashtirilgan jarrohlik ilmiy-amaliy tibbiyot markazining yetuk transplantolog mutaxassislari — professor Fazliddin Bahriddinov va ilmiy xodimlar Zohidjon Matkarimov, Ilyos Ablyalimov, Azamat Suyumov bilan birgalikda muvaffaqiyatli amalga oshirildi.
Ma’lum bo‘lishicha, Surxondaryo viloyati Angor tumanida yashovchi 49 yoshli Dilorom Shodiyeva farzandi 21 yoshli Sirojiddin Aliyevga hamda Nurota tumanida yashovchi 27 yoshli Abbos To‘xtayev esa otasi 58 yoshli Baxtiyor Nazarovga donorlik qilib, buyragini bergan.
“25-fevral kuni Navoiy viloyati hokimi Qobul Tursunov markazga kelib, buyrak ko‘chirib o‘tkazish operatsiyasini boshidan kechirgan bemorlar holidan xabar olgan”, — deyiladi xabarda.
Ma’lumot uchun, hozirda Navoiy viloyatida 75 nafar bemor surunkali buyrak yetishmovchiligi sababli rejali gemodializ seansini oladi va tibbiy nuqtayi nazardan ushbu bemorlarning barchasi buyrak ko‘chirib o‘tkazishga muhtoj.
Mavzuga doir:
Izoh (0)