Хивада 400 доллар пора сўраган кадастр ходимига жиноят иши қўзғатилди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, Хоразм вилояти «Ер мулк кадастр» ДК Урганч шаҳар филиали мутахассиси Ю.М., фуқаро Б.П.нинг ишончига кириб, юқори лавозимда ишловчи танишлари орқали унинг Хива шаҳрида жойлашган нотурар биноси ҳужжатларини турар жой сифатида расмийлаштириб бериши эвазига 400 доллар талаб қилган.
Шундан 300 долларни олган вақтида Бош прокуратура ҳузуридаги Департаментнинг Хива шаҳар бўлими ва ДХХ ходимлари билан ҳамкорликда ўтказилган тезкор тадбирда ашёвий далил билан ушланган.
Ҳолат юзасидан Ю.М.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Аввалроқ Андижонда санитария-эпидемиология назорати маркази ходими 4 минг доллар пора билан ушлангани, Тошкентда тадбиркордан 34 минг доллар пора олган «бозорқўм» ўринбосарига нисбатан жиноят иши қўзғатилгани хабар берилган эди.
Изоҳ (0)