Uzbekistan Airports компанияси Ўзбекистон аэропортларида хорижий авиакомпанияларга тегишли ҳаво кемаларига ерда хизмат кўрсатиш ставкалари пасайтирилишини эълон қилди.
1 мартдан бошлаб барча вилоят аэропортларига келаётган йўловчиларга хизмат кўрсатиш ставкаси бекор қилинади ва хорижий авиакомпанияларнинг юк рейсларида юкларни ортиш хизматининг ставкаси пасайтирилди.
Шу билан бирга, хорижий авиакомпанияларнинг бизнес-класс йўловчилари учун Тошкент халқаро аэропортининг Business Lounge юқори қулайликка эга залида хизмат кўрсатиш нархи арзонлаштирилди.
«Хорижий авиакомпанияларнинг республика аэропортларида парвозларни амалга ошириш харажатларини пасайтириш мамлакат аҳолиси ва чет эллик сайёҳлар учун авиачипталар нархини пасайтиришга йўналтирилган, бундан ташқари, юкларни ташиш учун тарифларнинг пасайтирилиши мамлакатнинг экспорт салоҳиятини янада ривожлантиришга ёрдам беради», — дейилади хабарда.
Аввалроқ Ўзбекистон аэропортлари тендер асосида хорижий компанияларга топширилиши ҳақида хабар берилганди. Шунингдек, 2020 йил Давлат дастури лойиҳасига кўра, Ўзбекистонда 5 та янги авиакомпания ташкил этилади.
Изоҳ (0)