ДТМ ИИВ ходимлари фарзандларига ОТМлар имтиҳонларида бериладиган имтиёзлар ҳақида маълумот берди

Ўзбекистон Республикаси Президентининг 2019 йил 26 февралдаги қарорида Ички ишлар органлари ходимлари фарзандларига давлат олий таълим муассасалари ҳамда Ўзбекистон Республикаси Мудофаа вазирлиги, Ички ишлар вазирлиги, Миллий гвардияси ва Давлат божхона қўмитасининг олий ва ўрта махсус таълим муассасаларига ўқишга кириш учун имтиёзлар белгиланган. Давлат тест маркази ушбу имтиёзлар ҳақида маълумот берди.

Хабарга кўра, Ўзбекистон Республикаси ички ишлар вазири томонидан бериладиган тавсиянома ва тақдимномалар имтиёз бериш учун асос бўлади.

Бунда Ўзбекистон Республикаси ички ишлар вазири томонидан:

давлат олий таълим муассасаларига кириш учун тавсиянома;

Ўзбекистон Республикаси Мудофаа вазирлиги, Ички ишлар вазирлиги, Миллий гвардияси ва Давлат божхона қўмитасининг олий ва ўрта махсус таълим муассасаларига ўқишга кириш учун тақдимнома берилади.

Ҳуқуқбузарликлар профилактикаси ва жиноятчиликка қарши курашда муносиб ҳисса қўшган, хизмат ёки илмий фаолиятда юқори натижаларга эришган ички ишлар органларининг амалдаги ходимлари фарзандларига:

Олий таълим муассасаларига кириш учун умумий қабул параметрларидан ташқари уч фоизли қабул кўрсаткичлари (қўшимча уч фоизли қабул квотаси) ажратилади. Уларга мазкур уч фоизли қабул кўрсаткичлари доирасида танловда иштирок этиш имтиёзи берилади (тавсиянома асосида).

Ҳарбий таълим муассасаларига кириш учун курсантлар (ўқувчилар)ни қабул қилишнинг умумий сонидан беш фоизли қабул кўрсаткичлари (қўшимча беш фоизли қабул квотаси) ажратилади. Уларга мазкур беш фоизли қабул кўрсаткичлари доирасида танловда иштирок этиш имтиёзи берилади (тақдимнома асосида).

Терроризм ва жиноятчиликка қарши курашиш ҳамда жамоат хавфсизлигини таъминлаш чоғида ҳалок бўлган ёки олган тан жароҳати туфайли ногирон бўлиб қолган ички ишлар органлари ходимларининг фарзандларига:

Олий таълим муассасаларига киришда танловсиз, белгиланган қабул параметрларидан ташқари давлат гранти асосида ўқишга кириш имтиёзи берилади (тавсиянома асосида).

Ҳарбий таълим муассасаларига киришда дастлабки ва касбий танлов натижаларига асосан, танловсиз, белгиланган қабул параметрларидан ташқари ўқишга кириш имтиёзи берилади (тақдимнома асосида).

Тавсиянома ва тақдимномаларнинг амал қилиш муддати уч йил деб белгилаб қўйилган.