Ўзбекистон Энергетика вазирлиги Жаҳон банки билан биргаликда Самарқанд ва Жиззах вилоятларида ҳар бирининг қуввати 200 мегаватт бўлган иккита қуёш электр станцияси қурилиши бўйича тендер эълон қилди. Бу ҳақда вазирлик томонидан хабар берилди.

Ўзбекистон 2018 йилда Жаҳон банки таркибига кирувчи Халқаро молия корпорацияси билан қиймати бир миллиард доллар бўлган қуёш электр станцияларини молиялаштириш, лойиҳалаш, қуриш ва ишлатиш учун хусусий инвесторларни таклиф қилиш бўйича консультатив хизматлар кўрсатиш юзасидан келишув имзолаган. Келишувнинг синов лойиҳаси Навоий вилоятида қуриладиган қуввати 100 мегаватт бўлган қуёш электр станцияси бўлади. 2019 йилнинг ноябрь ойида унинг қурилиши бўйича тендерда БААнинг Masdar компанияси ғолиб чиққан эди.

Янги тендер натижасида 25 йил муддатга давлат-хусусий шериклик асосида иккита станцияни қуриш учун битта ё иккита ғолиб ёки консорсиум танланади.

Танловнинг биринчи босқичида 21 мартга қадар унинг иштирокчилари дастлабки саралашдан ўтказилади. Санаси кейинроқ эълон қилинадиган иккинчи босқичда танланган иштирокчилар ўзининг техник ва молиявий таклифларини тақдим этади. Тендер бўйича маслаҳатчи Халқаро молия корпорацияси ҳисобланади.

2020 йилнинг февраль ойи бошида Ўзбекистон Энергетика вазирлиги Сурхондарё вилоятида давлат-хусусий шериклик асосида қуввати 200 мегаватт бўлган қуёш электр станциясини қуриш бўйича тендер эълон қилган эди. Ушбу лойиҳа Осиё тараққиёт банки билан 2019 йил август ойида имзоланган дастур доирасида амалга оширилмоқда. Дастурнинг қиймати 800 миллион долларни ташкил қилади.