Имтиёзли тоифадаги беморларга бериладиган ордерларни ажратишда шаффофликни таъминлаш ва навбат кутишларни йўқ қилиш мақсадида тиббий танлов комиссияси таркибига жиддий ўзгаришлар киритилиши кутилмоқда. 21 февраль куни Олий Мажлис Қонунчилик палатаси Фуқароларнинг соғлиғини сақлаш масалалари қўмитаси томонидан ўтказилган йиғилишда таъкидланишича, кучли жамоатчилик назорати ўрнатилишини даврнинг ўзи тақозо қилмоқда.
«Дарё» мухбири Миролим Исажоновнинг хабар беришича, таҳлилий-танқидий руҳда кечган тадбирда депутатлар ва ССВ расмийлари ордер бериш тартибига оид бир қатор таклифларни илгари суришди. Соғлиқни сақлаш вазирининг биринчи ўринбосари Баҳодир Юсупалиев ордер айнан эҳтиёжманд фуқароларга ажратилиши ва онлайн режим яратиш лозимлигини билдирди.
«16 та республика илмий-амалий тиббиёт марказига даволаниш учун бериладиган ордерларни ажратиш жараёнига жамоатчиликни жалб этишимиз керак. Жамоатчилик назорати ўрнатилса, бу тизим анча тартибга солинади. Бу бўйича вазирлик томонидан тегишли кўрсатма берилади ва ҳудудлардаги тиббий-танлов комиссияси таркибига жамоатчилик вакиллари, депутатлар киритилади.
Ордерга ҳақиқий муҳтож бўлган беморларни аниқлаб, уларнинг рўйхатини шакллантириш асосий масалалардан биридир. Бу борада, аввал, қўмита ва вазирлик ўртасида қўшма дастурни ишлаб чиқиш тарафдориман. Вилоят тиббий-танлов комиссияси, ихтисослашган марказлар, вазирлик ва қўмитага уланган онлайн тизим яратилиши керак. Шу орқали ордер олиш учун рўйхатда турган инсонларни жамоатчилик кузатиб боради. Бунинг учун озгина вақт керак, албатта. Муҳими бемор эмас, унинг ҳужжатлари электрон ҳолатда ҳаракатланиши керак. Ушбу тизимни йўлга қўйишда парламент аъзолари яқиндан кўмаклашишини истардим», — деди Юсупалиев.
ССВ расмийсининг айтишича, нафақат фуқаролар, балки ҳокимлар ҳам профилактик кўрикдан тез-тез ўтмайди.
«Ҳеч кимга сир эмас, кўпчилик ўз соғлиғига беэътибор бўлади. Ётиб қолса, шифохонага боради. Унгача Худо хоҳласа, яхши бўлади, деб юраверамиз. Биз ҳозир юқори технология деймиз, у етмаяпти, бу етмаяпти, инсулт бўлди, ётиб қолди, деймиз. Унгача бориш даврида нима қилдингиз, деган саволга кўпчилигимиз жавоб беролмаймиз. Ҳокимлар билан гаплашганимизда ‘Ўзингиз охирги марта профилактик кўрикдан қачон ўтдингиз?’ дейилса, тўғрисини айтаман, 90 фоизи ўтмаганман, дейди. Шунинг учун ихтисослашган тиббий ёрдамга етгунга қадар биргаликда ҳаракат қилиб, ишлашимиз керак.
Президентимиз ҳам юқумли бўлмаган – инфаркт, инсулт, онкологик касалликларнинг олдини олиш бўйича муҳим чора-тадбирлар кўриш масаласини қўйди. Бу ишни тегишли марказимиз билан бошладик. Бундан ташқари, 40 ёшдан юқори аҳоли ўртасида сўровнома тарқатиб, юқумли бўлмаган касалликлар қайси омиллар туфайли келиб чиқаётгани, қайси сабабларни йўқ қилишимиз ва қандай тавсиялар беришимизни атрофлича ўрганмоқдамиз», — деди Баҳодир Юсупалиев.
Изоҳ (0)