Тошкентнинг Яккасарой тумани «Юнус Ражабий» маҳалласидаги 20 февраль куни бутун бошли дарахтзор қурувчи ташкилот томонидан Тошкентнинг собиқ ҳокими Раҳмонбек Усмонов имзолаган, кейинчалик ноқонуний деб топилган қарор асосида кесиб ташланган эди. Дарахтларни кесишга жорий этилган мораторийга зид ўлароқ содир этилган ушбу ҳодиса жамоатчилик эътирозига сабаб бўлиб, шаҳар ва мамлакат раҳбарияти эътиборини ўзига қаратди.
23 февралга ўтар кечаси ва бутун 23 февраль давомида кесилган дарахтлар ўрнида янги дарахтларни экиш ва суғориш тизимини ётқизиш бўйича иш олиб борилди. Расмийлар дарахтзор ўрнида яшил маскан ташкил этилиши, кесилган 81 та дарахт ўрнига 150 та дарахт — 37 та каштан, 39 та чинор, 37 та акация ва 37 та пушти дарахтлар ўтқазилишини маълум қилди. Ҳар бир янги кўчатнинг бўйи 3,5-4 метрга етган.
Ушбу воқеадан сўнг дарахтларни кесишга рухсат берган Яккасарой тумани ҳокими ўринбосари Абдувосилхон Сатторовга нисбатан Жиноят кодексининг 205-моддаси 2-қисми «а» банди билан, шаҳар собиқ ҳокими Раҳмонбек Усмоновнинг ноқонуний қарори асосида дарахтзор ўрнида кўп қаватли уй қурмоқчи бўлган Building and Supplies компанияси таъсисчиси Абдураҳим Қодировга нисбатан 198-модданинг 2-қисми билан жиноят иши қўзғатилган.
Яккасарой тумани Ички ишлар органлари фаолиятини мувофиқлаштириш бошқармаси бошлиғи Х.Ҳайдаров ва ҳудудий ИИБ бошлиғи Х.Ўринбоев, шунингдек, туман прокурори Н.Аллабергеновага ҳайфсан эълон қилинган. «Юнус Ражабий» маҳалласи профилактика инспектори С.Сафаров эса эгаллаб турган лавозимидан озод қилинган.Тошкент шаҳар прокурори Баҳриддин Валиев «Ўзбекистон 24» телеканалига берган интервьюсида Президентнинг мораторий жорий этиш ҳақидаги фармони талабларини бажаришда камчиликларга йўл қўйилганини тан олди.
«Биз қонунларнинг ижросини бир хилда таъминлашда Президентимиз ва халқимиз олдидаги ишончни оқлай олмадик. 2019 йил 30 октябрда дов-дарахтларни кесишга мораторий эълон қилинган, шу муносабат билан Президент фармони қабул қилинган. Шу фармоннинг жойлардаги ижросини назорат қилишда камчиликларга йўл қўйдик. Натижада Яккасарой тумани ‘Юнус Ражабий’ маҳалласида 81 та дарахтнинг кесилишига йўл қўйилди», — деди у.
Изоҳ (0)