Тошкент шаҳар, Яккасарой тумани, «Юнус Ражабий» маҳалласида кўп йиллик 81 та дарахтларнинг қонунга хилоф равишда кесилганлиги ҳолати бўйича тўпланган ҳужжатлар ўрганилиб, айбдорларга нисбатан жиноят иши қўзғатилгани юзасидан 23 февраль куни Тошкент шаҳар прокуратурасида мутасадди идоралар иштирокида тезкор йиғилиш ўтказилди. Бу ҳақда Тошкент шаҳар прокуратураси ахборот хизмати хабар берди.
Йиғилишда Тошкент шаҳар прокурорининг 2020 йил 23 февралдаги буйруғи билан Яккасарой туман прокурори Н.А.Аллабергеновага ўз хизмат вазифасини лозим даражада бажармай, туманда қонунлар ижроси устидан етарли прокурор назоратини ўрнатмагани учун ҳайфсан эълон қилинди.
Тошкент шаҳар экология ва атроф муҳитни муҳофаза қилиш бошқармаси ўзининг Facebook’даги саҳифаси орқали Яккасарой тумани Юнус Ражабий кўчаси 66/1, 66/2, 66/3, 66/4 ҳамда 72-уйлар оралиғидаги дарахтларнинг кесилиши бўйича маълумот берган. Олий Мажлис Қонунчилик палатаси депутати Расул Кушербаев 20 февраль куни туман аҳолиси ва тадбиркорлар билан учрашиб, Тошкент шаҳрининг собиқ ҳокими қарори ноқонуний бўлганини айтгани ҳақида видео тарқалганди.
https://www.facebook.com/100005001224899/videos/1524334631076563/
Изоҳ (0)