Ўзбекистон Қуролли Кучлари кичик мутахассисларни тайёрлаш марказида бўлиб ўтган навбатдаги тантанали битирув тадбирида 200 га яқин курсантга ҳарбий унвонлар топширилди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Тадбирда Марказий ҳарбий округ қўшинлари қўмондони полковник Ойбек Саидов, Мудофаа вазирлиги кадрлар бош бошқармаси бошлиғи полковник Фарҳод Шерматов, Самарқанд вилояти «Нуронийлар» жамғармаси кенгаши вакиллари, фахрийлар, давлат ва жамоат ташкилотлари вакиллари, ота-оналар ҳамда бир гуруҳ ёшлар иштирок этди.
Сўзга чиққанлар ҳарбий соҳада амалга оширилаётган ислоҳотлар, Ўзбекистонда кичик мутахассислар тайёрлашнинг замон талабларига жавоб берадиган самарали тизими яратилганлиги, ҳарбий хизматчилар ўз билим, малакаси ва маҳорати билан Қуролли Кучлар сафларидан муносиб ўрин эгаллаётганлиги алоҳида таъкидлаб ўтилди.
Шундан сўнг, 450 нафар курсантга сертификат ва кўкрак нишонлари топширилди, улардан 180 нафари эса навбатдаги «кичик сержант» ҳарбий унвонини олди.
Тадбирда курсантларнинг қўл жанги бўйича кўргазмали чиқишлари, Самарқанд вилояти Ҳамид Олимжон номидаги драма театрининг саҳна кўринишлари ва концерт дастури намойиш этилди.
Шунингдек, тадбирда курсантлар томонидан инновацион ёндашув асосида яратилган «Кўчма техник хизмат кўрсатиш ускунаси»ни дала шароитларида фойдаланиш тартиблари ҳам кўрсатилди.
Изоҳ (0)