O‘zbekiston Qurolli Kuchlari kichik mutaxassislarni tayyorlash markazida bo‘lib o‘tgan navbatdagi tantanali bitiruv tadbirida 200 ga yaqin kursantga harbiy unvonlar topshirildi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.

Tadbirda Markaziy harbiy okrug qo‘shinlari qo‘mondoni polkovnik Oybek Saidov, Mudofaa vazirligi kadrlar bosh boshqarmasi boshlig‘i polkovnik Farhod Shermatov, Samarqand viloyati “Nuroniylar” jamg‘armasi kengashi vakillari, faxriylar, davlat va jamoat tashkilotlari vakillari, ota-onalar hamda bir guruh yoshlar ishtirok etdi.

So‘zga chiqqanlar harbiy sohada amalga oshirilayotgan islohotlar, O‘zbekistonda kichik mutaxassislar tayyorlashning zamon talablariga javob beradigan samarali tizimi yaratilganligi, harbiy xizmatchilar o‘z bilim, malakasi va mahorati bilan Qurolli Kuchlar saflaridan munosib o‘rin egallayotganligi alohida ta’kidlab o‘tildi.

Shundan so‘ng, 450 nafar kursantga sertifikat va ko‘krak nishonlari topshirildi, ulardan 180 nafari esa navbatdagi “kichik serjant” harbiy unvonini oldi.

Tadbirda kursantlarning qo‘l jangi bo‘yicha ko‘rgazmali chiqishlari, Samarqand viloyati Hamid Olimjon nomidagi drama teatrining sahna ko‘rinishlari va konsert dasturi namoyish etildi.

Shuningdek, tadbirda kursantlar tomonidan innovatsion yondashuv asosida yaratilgan “Ko‘chma texnik xizmat ko‘rsatish uskunasi”ni dala sharoitlarida foydalanish tartiblari ham ko‘rsatildi.