Жанубий Кореяда COVID-19 коронавирусига чалинган бемор вафот этди. Бу ҳақда мамлакат ҳукумати вакиллари хабар берган, деб ёзмоқда «Yonxap».
Вафот этган бемор мамлакат жанубидаги Чхондо шаҳри касалхонасида пневмониядан даволанойтган бўлган. Касалда коронавирус борлиги у вафот этганидан кейин тасдиғини топган. Ўлимга нима сабаб бўлгани ҳақида аниқ маълумот берилмаган.
Жанубий Кореяда бир кун ичида яна 53 нафар одамнинг вирусга йўлиққанлиги аниқланган, шу тариқа мамлакатда коронавирусга чалинганлар сони 104 нафарга етган. Янги касалларнинг аксар қисми Корея жанубидаги Тегу шаҳрида яшайди. Шаҳар ҳокими маҳаллий аҳолидан иложи борича кўчага чиқмасликни, Жаҳон соғлиқни сақлаш ташкилоти тавсияларига амал қилишни сўраган.
«Yonxap» агентлиги хабарига кўра, тахминан 40 нафар одам 61 ёшли кореялик аёл билан мулоқотдан кейин коронавирусни юқтириб олган. Тахминларга кўра, коронавирус уларнинг битта черковга қатнаши оқибатида юққан.
19 февралда Эрон ҳукумати вакиллари мамлакатда икки нафар одамнинг коронавирус қўзғаган касаллик оқибатида вафот этганини тасдиқлаган. Diamond Princess кемасидаги икки киши коронавирус оқибатида вафот этгани маълум қилинган. Уларнинг иккови ҳам япониялик 87 ёшли эркак ва 84 ёшли аёл. Аввал Францияда хитойлик 80 ёшли сайёҳ оламдан ўтган, Японияда 80 ёшли аёл коронавирус қурбонига айланган, Тайванда эса коронавирус 60 ёшли эркакни ҳаётдан олиб кетганди.
Мавзуга доир:
Коронавирус 2019 йилнинг декабрь ойи охирида Хитойнинг Хубэй провинцияси Ухань шаҳрида тарқалган. Коронавирус Хитойдан ташқари яна 20 та бошқа хориж давлатларида ҳам қайд этилган. Вирус одамдан одамга ҳаво-томчи йўли орқали юқади. Унга чалинган беморларда иситма кўтарилиши, тезда чарчаб қолиш ва сўлак чиқариб йўталиш ҳолатлари кузатилади. Касалликнинг яширин даври 14 кунни ташкил қилади.
Изоҳ (0)