Xitoy Sog‘liqni saqlash milliy komissiyasi COVID-2019 koronavirus infeksiyasidan davolanishga mo‘ljallangan yangi dorilar ro‘yxatini taqdim etdi. Xitoylik shifokorlar oltinchi marotaba yangilanayotgan ushbu ro‘yxatga davolash ishlarida foyda berishi taxmin qilinayotgan bir qator dorilarni qo‘shgan.

Foto: Inosmi

Ro‘yxatdan odatda bezgakda foydalaniladigan “Xloroxinfosfat”, OIVni davolashda ishlatiladigan “Lopiranavir” yoki “Interferon”ning “Ribavrivin” bilan kombinatsiyasi hamda “Abidol” o‘rin olgan.

The Bell’ning yozishicha, so‘nggi holatda SSSRda ishlab chiqarilgan “Arbidol”ning muqobili bo‘lgan “Jenerik”dan foydalanish mumkin. Shu nomdagi boshqa dorilar ham mavjud.

Komissiyaning ta’kidlashicha, koronavirusdan davolanishda foydalaniladigan dorilarning samaradorligini qo‘shimcha ravishda yana baholash kerak. Tavsiyalarda aytilishicha, infeksiya bilan yengil kasallanganlarni “Abidol”dan tashqari an’anaviy Xitoy tibbiyoti bilan ham davolasa bo‘ladi, masalan, turli o‘simliklar qaynatmasi bilan.

Avvalroq JSST 2019-nCoV virusiga qarshi ta’sir ko‘rsata oladigan dori vositalari hozircha mavjud emasligi, lekin kasallikka chalinganlarning ko‘p qismi undan vafot etmay, ular muolajalar yordamida shifo topayotganini ma’lum qilgandi. Shuningdek, koronavirus infeksiya qo‘zg‘atuvchining genlarini o‘rgangan xitoylik virusologlar uning 2003-yilda butun dunyoga tarqalgan SARS atipik pnevmoniyasining “yaqin qarindoshi” degan xulosaga kelgandi.