19 февраль куни тунда Германиянинг Ханау шаҳридаги иккита туманда отишма содир бўлди. Қуролланган жиноятчи тунги соат ўнлар атрофида шаҳар марказидаги Midnight чилимхонасига ҳужум уюштирган. Гувоҳлар саккиз ёки тўққизта ўқ овозини эшитганликларини билдирган. Жиноятчи ушбу чилимхонадан чиқиб, автомобилда дастлабки жойдан икки километр узоқликдаги Кесселштадт тумани томон йўл олган. У ерда Arena Bar & Cafe чилимхона-барининг икки нафар мижозига ўқ узган.
Ҳужум уюштирган эркак чилимхоналарда тўққиз нафар одамни ўлдирган ва яна тўрт нафар мижозни яралаган, дейилади полиция маълумотида. Bild нашрининг ёзишича, биринчи чилимхонада беш нафар одам ҳалок бўлган, улар орасида курдлар ҳам бор. Ҳали расман маълум қилингани йўқ, бироқ DPA берган хабарга кўра, ҳужум оқибатида яна бир нечта хорижликлар ҳалок бўлган. Deutsche Welle’га кўра, ўлганларнинг уч нафари бир вақтлар Туркиядан келганлар, яна беш нафари — Шимолий Африкадан келиб Германияда яшаётган фуқаролар бўлган.
https://twitter.com/i/status/1230241824092102658
Гумонланувчи ўз онасини ҳам ўлдирган ва ўз жонига суиқасд қилган. Отишмадан етти соат ўтгач полиция махсус операция ўтказиб, иккинчи чилимхона яқинида жойлашган уйда уни ўлик ҳолда топган. Хонадондан гумонланувчининг мурдаси, шунингдек унинг 72 ёшли онасининг жасади тоилган. Полиция вакиллари ушбу жиноят иши юзасидан бошқа гумонланувчиларни изламаётганини маълум қилган.
Spiegel нашри Германия полициясининг Ханауда гумонланувчи Тобиас Р.нинг отасини ҳибсга олганини хабар қилган. Хабарга кўра, Тобиаснинг отаси мурдалар топилган уйда вақтинча қамоққа олинган. Redaktions Netzwerk Deutschland (RND) медиагуруҳининг қайд этишича, жиноятчи фойдаланган қурол Glok пистолети бўлиб Тобиас Р. уни 2014 йилда Интернет дўкондан харид қилган.
Германия ҳукумати Ханаудаги ҳужумга теракт деб баҳо берган. Гессен ички ишлар вазири Петер Бойт жиноятчи ўнглар экстремистик таъсирига тушиб қолгани туфайли ушбу тажовузкор ҳаракатларни содир этган деб ҳисобламоқда. Жиноятда ирқчилик аломатлари мавжуд, чунки отилганларнинг аксар қисми хорижликлар, деган Бавария ички ишлар вазири Ёаҳим Херман. Германия канцлери Ангела Меркель ирқчилик ва нафрат жамият кушандаси эканини қайд этган. Туркия ҳукумати ушбу отишмани «расистлик руҳидаги ҳужум» деб атаган.
Оммавий қотилликни содир этганликда 43 ёшли фуқародан гумон қилинмоқда. У аввал полиция эътиборидан четда, кўзга ташланмай яшаган. Hessenschau нашрининг ёзишича, жиноятчи қурол олиб юриш ҳуқуқига эга бўлган ва қуролдан ўқ отиш спорт тури билан шуғулланган. Немис ОАВ хабарларида, унинг исми Тобиас экани фамилияси эса Р. ҳарфидан бошланиши ҳақида маълумот берилган. Independent журналисти Лиззи Дирден унинг Тобиас Ратен (Tobias Rathjen) эканини ёзган. Гумонланувчининг ҳозир ўчириб ташланган Youtube’даги саҳифасида шундай исм-шариф ёзиб қўйилган. Германия ТИВ раҳбари Хайко Маас агар тахминлар ўз тасдиғини топса, бу бир йил ичида ўнг радикаллар томонидан амалга оширилган учинчи катта қотиллик бўлишини айтган.
Радикаллашув ва сиёсий зўравонлик халқаро маркази (ICSR) асосчиси Петер Нойман жиноятчининг 24 саҳифадан иборат манифест қолдирганини маълум қилди. Ратен ўз мурожаатида хорижликларга тоқат қила олмаслигини, асосий аҳолиси мусулмонлар бўлган мамлакатларни душман ҳисоблаши ҳақида ёзган. Шунингдек, разведка идораларининг бутун умри давомида ўзини таъқиб қилишганини баён қилган.
Шунингдек, у барча америкаликларга шахсий видеомурожаатини қолдирган. Видео Youtube’га оммавий қотилликлардан бир неча кун олдин юкланган ва 20 февраль тонгида ўчириб ташланган, дейилади Focus хабарида. Тобиас Ратен АҚШда болаларни ўлдирувчи ҳарбий объектлар борлиги ҳақида маълумот берган. У америкаликларни бунга қарши курашишга чорлаган. Видеоролик муаллифи араб мамлакатларидан ва Туркиядан келган муҳожирларни ёмон кўриши ҳақида ҳам гапирган. Лекин Германияда уларга ҳужум уюштириши мумкинлигига шаъма ҳам қилмаган.
Изоҳ (0)